आरआरबी परीक्षा लेल पूर्व रेलवेक विशेष सुविधा, भागलपुर–किऊलक बीच चलत परीक्षा स्पेशल ट्रेन

लेवल-1 CBT परीक्षार्थीसँ भीड़क समस्या कम करबाक प्रयास, अगस्तक चयनित तिथिमे अनारक्षित विशेष ट्रेनक संचालन

भागलपुर । समदिया

रेलवे भर्ती बोर्ड (RRB) केर लेवल-1 कंप्यूटर आधारित परीक्षा (CBT) मे शामिल होमय जा रहल हजारों अभ्यर्थी लेल पूर्व रेलवे पैघ राहतक घोषणा कयलक अछि। परीक्षा अवधिमे सामान्य ट्रेनमे बढ़ैत भीड़केँ ध्यानमे राखैत भागलपुर आ किऊलक बीच विशेष अनारक्षित “परीक्षा स्पेशल” ट्रेन चलाओल जाएत, जाहिसँ परीक्षार्थी समय पर अपन परीक्षा केन्द्र धरि सहजतासँ पहुँचि सकथि।

पूर्व रेलवेक मुख्य जनसंपर्क अधिकारी शिबराम मांझीक अनुसार गाड़ी संख्या 03409 भागलपुर–किऊल परीक्षा स्पेशल 3, 4, 5, 6, 9, 10, 11, 12, 13, 14, 17, 18, 19, 20, 21 आ 25 अगस्त 2026 केँ संचालित होएत। ई ट्रेन साँझ 7:30 बजे भागलपुरसँ खुलत आ राति 10:30 बजे किऊल पहुँचत।

वापसीमे 03410 किऊल–भागलपुर परीक्षा स्पेशल ओहि सभ तिथिमे राति 11:30 बजे किऊलसँ प्रस्थान करत आ भोर 3:00 बजे भागलपुर पहुँचत।

रेल प्रशासनक अनुसार ई विशेष ट्रेन मार्गक सभ स्टेशन—जमालपुर, धरहरा, अभयपुर, कजरा, उरैन सहित अन्य स्टेशन—पर ठहरत। एकर लाभ भागलपुर–किऊल रेलखंडक हजारों छात्र-छात्राकेँ भेटत, जे परीक्षा देबाक लेल यात्रा करैत छथि।

रेलवेक मानब अछि जे RRB परीक्षा दौरान सामान्य ट्रेनमे अत्यधिक भीड़ रहबाक कारण परीक्षार्थीकेँ समय पर परीक्षा केन्द्र पहुँचब कठिन भऽ जाइत अछि। विशेष ट्रेनक संचालनसँ भीड़क दबाव घटत आ अभ्यर्थीकेँ सुरक्षित, सुविधाजनक आ समयबद्ध यात्रा सुनिश्चित भऽ सकत।

पूर्व रेलवे परीक्षा अवधिमे भीड़ प्रबंधन, सुरक्षा व्यवस्था आ समय पर ट्रेन संचालन लेल संबंधित अधिकारीसभकेँ विशेष निर्देश देने अछि। रेलवे सुरक्षा बल (RPF) आ स्टेशन प्रशासनकेँ सेहो सतर्क रहबाक आदेश देल गेल अछि।

रेल प्रशासन परीक्षार्थीसभसँ अपील कयने अछि जे यात्रा पूर्व योजना बना कऽ समयसँ स्टेशन पहुँचथि, वैध टिकट लऽ यात्रा करथि तथा अपन प्रवेश-पत्र, वैध पहचान पत्र आ अन्य आवश्यक कागजात अवश्य संग राखथि।

पुनर्जागरण दृष्टि :

परीक्षा मौसममे विशेष ट्रेनक संचालन पूर्व रेलवेक सराहनीय पहल अछि। एहि निर्णयसँ हजारों युवा अभ्यर्थीकेँ राहत भेटत, सामान्य ट्रेन पर भीड़क दबाव कम होएत आ छात्रसभ बिना अनावश्यक तनावक अपन परीक्षापर ध्यान केन्द्रित कऽ सकैत छथि।