टीआरई-4 वेकेंसी : बिहारमे 32,388 शिक्षकक होएत बहाली : सीएम सम्राट चौधरी
पटना । समदिया
बिहारमे शिक्षक बहालीक इंतजार कऽ रहल लाखों अभ्यर्थी लेल एकटा पैघ खुशखबरी अछि। मुख्यमंत्री सम्राट चौधरी बुधदिन सोशल मीडिया प्लेटफॉर्म X पर जानकारी देलनि जे TRE-4 अंतर्गत 32,388 शिक्षकक नियुक्ति लेल शिक्षा विभाग बिहार लोक सेवा आयोग (BPSC) केँ अधियाचना पठा देने अछि।
मुख्यमंत्री एकरा बिहारक युवासभ लेल ऐतिहासिक उपहार बतबैत कहलनि जे सरकार गुणवत्तापूर्ण शिक्षा सुनिश्चित करबाक संग-संग युवासभ लेल रोजगारक अवसर बढ़ेबामे निरंतर प्रयासरत अछि।
सम्राट चौधरी अपन पोस्टमे कहलनि जे विकसित बिहारक संकल्प पूरा करबाक लेल शिक्षा व्यवस्थाकेँ मजबूत बनायब आ युवासभ केँ रोजगार उपलब्ध करायब सरकारक सर्वोच्च प्राथमिकतामे शामिल अछि।
TRE-4 अंतर्गत भेजल गेल अधियाचनाक अनुसार कुल 32,388 पद पर शिक्षकक बहाली कएल जाएत। पदक वर्गीकरण एहि प्रकार अछि—
– कक्षा 1 सँ 5 : 3,847 पद
– कक्षा 6 सँ 8 : 8,563 पद
– कक्षा 9 सँ 10 : 3,877 पद
– कक्षा 11 सँ 12 : 16,101 पद
एहि अनुसार माध्यमिक आ उच्च माध्यमिक स्तर पर सभसँ बेसी रिक्त पद भरबाक तैयारी कएल गेल अछि।
शिक्षा विभाग द्वारा अधियाचना BPSC केँ पठाएलाक बाद आब अभ्यर्थीसभक नजर आयोग द्वारा जारी होमय वला आधिकारिक अधिसूचनापर अछि। उम्मीद कएल जा रहल अछि जे आयोग जल्दिए भर्ती प्रक्रिया, ऑनलाइन आवेदन आ परीक्षा कार्यक्रमक घोषणा करत। हालांकि, आवेदनक तिथि संबंधमे एखन धरि कोनो आधिकारिक घोषणा नहि भेल अछि।
मुख्यमंत्री सम्राट चौधरी कहलनि जे हुनकर सरकार युवासभ केँ अधिकसँ अधिक रोजगार उपलब्ध कराबय आ बिहारक शिक्षा व्यवस्थाकेँ नव ऊँचाइ धरि पहुँचाबय लेल पूर्ण रूपेँ प्रतिबद्ध अछि। सरकारक लक्ष्य विद्यालयसभमे शिक्षकक कमी दूर कऽ छात्रसभकेँ बेहतर आ गुणवत्तापूर्ण शिक्षा उपलब्ध करेनाइ अछि।
