बिहारमे वज्रपातक कहरसँ 4 मृत्यु आ 2 महिला झरकल
नवादा। समदिया
बिहारक नवादामे दर्दनाक घटना घटल अछि। आकाशीय बिजली खसयसँ चारि लोकक जान चलि गेल अछि। ओतय दू महिला झरकल अछि। जिनका इलाजक लेल नारदीगंज स्थित प्राथमिक स्वास्थ्य केंद्रमे भर्ती कराओल गेल अछि। मामिला नारदीगंजक सांगोवर गामक अछि।
मृतकक पहिचान भुवनेश्वर राजवंशी (62 वर्ष), मदन राजवंशी (47 वर्ष), शंभू यादव (44 वर्ष) आ सोनू कुमार (9 वर्ष) केर रूपमे भेल अछि। ओतय, घायलमे लालजीत यादवक पत्नी शोभा देवी (40 वर्ष) आ कविंद्र प्रसादक पत्नी सुनीता देवी (50 वर्ष) शामिल छथि।
परिजन बतौलनि कि सभ लोक बारिशसँ बचय लेल बरगदक पेड़क नीचा शरण लेने छल, तहने अचानक तेज गर्जनाक संग बिजली खसल आ इ दर्दनाक हादसा भ गेल। “सभ लोक खेतमे काज कय रहल छल। एही दौरान दुपहर बाद अचानक मौसम बदलल आ तेज बारिश शुरू भ गेल। बारिशसँ बचय लेल बरगद गाछक नीचा सभ शरण लेने छल, तहने अचानक तेज गर्जनाक संग वज्रपात भेल आ सभ ओहि केर चपेटमे आबि गेल।
आनन-फाननमे सभ घायलकेँ स्वास्थ्य केंद्र नारदीगंजमे भर्ती कराओल गेल, मुदा डॉक्टर चारि लोककेँ मृत घोषित कय देलक, जखनि कि दुनू घायलक इलाज चलि रहल अछि। मृतकक परिजनक कानि कानि कय हाल बेहाल छल।
प्रशासन घटनाक पुष्टि करैत मृतकक परिजनकेँ सरकारी सहायता देबाक आश्वासन देलक। नारदीगंज थाना प्रभारी राजेश कुमार लोकसँ अपील कयलनि जे बारिशक दौरान गाछक नीचा नहि रहू।
