ऑक्सफोर्डसँ जुड़त मिथिला संस्कृत शोध संस्थान, सरकार देलक मंजूरी : संजय झा

दरिभंगा।  समदिया

जनता दल यूनाइटेडक कार्यकारी राष्ट्रीय अध्यक्ष एवं राज्यसभा सांसद संजय झा कहलनि कि बिहार सरकार मिथिला संस्कृत शोध संस्थान, दरिभंगा आ इंग्लैंड स्थित ऑक्सफोर्ड यूनिवर्सिटीक ऑक्सफोर्ड संस्कृत टेक्स्ट सोसाइटीक बीच संस्थागत सहयोगक प्रस्तावकेँ औपचारिक मंजूरी द देलक। ओ एकरा मिथिला आ ऑक्सफोर्डक बीच ज्ञानक ऐतिहासिक साझेदारीक दिशामे महत्वपूर्ण पहल बतौलनि।

संजय झा कहलनि कि बिहार सरकारक उच्च शिक्षा विभाग मिथिला संस्कृत शोध संस्थान, दरिभंगाक संग संस्थागत सहयोगक लेल ऑक्सफोर्ड संस्कृत टेक्स्ट सोसाइटीसँ भेटल प्रस्तावक स्वागत करैत औपचारिक सहमति प्रदान कय देलक। हुनक अनुसार इ फैसला बिहारक शैक्षणिक आ सांस्कृतिक विरासतकेँ वैश्विक मंच धरि पहुंचाबयमे अहम भूमिका निभाओत।

संजय झा बतौलनि कि ओ 7 जुलाईकेँ पटनामे मुख्यमंत्री सम्राट चौधरीसँ भेंट कय मिथिला संस्कृत शोध संस्थान आ ऑक्सफोर्ड यूनिवर्सिटीक ऑक्सफोर्ड संस्कृत टेक्स्ट सोसाइटीक बीच संस्थागत अनुबंधक अनुरोध कयने छलथि। एही दौरान ओ करारक महत्वक विस्तृत जानकारी देलनि आ ऑक्सफोर्ड संस्कृत टेक्स्ट सोसाइटीसँ प्राप्त औपचारिक प्रस्तावक प्रति सेहो मुख्यमंत्रीकेँ सौंपलनि। ओ कहलनि कि मुख्यमंत्री प्रस्तावक सराहना करैत ओहि समय उच्च शिक्षा विभागक अधिकारीकेँ आवश्यक कार्यवाहीक निर्देश देने छलथि।

संजय झा विश्वास जतौलनि कि इ अंतरराष्ट्रीय संस्थागत करार मिथिला समेत पूरा बिहारक बौद्धिक विरासतकेँ पुनर्जीवित करय आ ओकरा वैश्विक पहिचान दियाबय केर दिशामे ऐतिहासिक साबित होयत। ओ कहलनि कि एहीसँ मिथिला संस्कृत शोध संस्थान, दरिभंगामे संरक्षित हजारों प्राचीन आ दुर्लभ पांडुलिपीक वैज्ञानिक सूचीकरण, डिजिटलीकरण, शोध आ अंतरराष्ट्रीय स्तर पर समालोचनात्मक संस्करणक प्रकाशन संभव भ सकत। संग-संग संस्थानकेँ फेरसँ ज्ञानक वैश्विक केंद्रक रूपमे स्थापित करय आ बिहारक शोधार्थीकेँ अंतरराष्ट्रीय परियोजना, फेलोशिप आ प्रशिक्षणसँ जुड़बाक नव अवसर भेटत।

संजय झा कहलनि, इ अनुबंध प्रधानमंत्री नरेंद्र मोदीक नेतृत्वमे शुरू कयल गेल ‘ज्ञान भारतम् मिशन’ केँ सेहो नव मजबूती प्रदान करत। हुनक कहब अछि कि एही पहलसँ भारतीय ज्ञान परंपरा आ संस्कृत साहित्यक संरक्षण आ वैश्विक प्रसारकेँ गति भेटत।

ओ बतौलनि कि एहीसँ पहिने जनवरी 2025मे ‘प्रगति यात्रा’ केर दौरान तत्कालीन मुख्यमंत्री नीतीश कुमारक घोषणाक अनुरूप फरवरी 2025मे राज्य मंत्रिमंडल मिथिला संस्कृत शोध संस्थान, दरिभंगाक जीर्णोद्धार आ पांडुलिपीक संरक्षणक लेल करीब 57 करोड़ रुपयाक स्वीकृति देने छल। एही योजनाक तहत वर्तमानमे काज चलि रहल अछि।