रक्षा क्षेत्रक पहिल सह-विकास परियोजना पर समझौता, एआई आ सेमीकंडक्टरक सहयोगकेँ नव रफ्तार : पीएम मोदी

नई दिल्ली।  समदिया

प्रधानमंत्री नरेंद्र मोदी काल्हि बृहस्पतिदिन घोषणा कयलनि कि भारत आ जापान रक्षा क्षेत्रमे पहिल सह-विकास परियोजना पर समझौता कयलक। ओ एकरा दूनू राष्ट्रक बीच सामरिक संबंधकेँ नव ऊंचाई पर पहुँचय केर दिशामे एगो महत्वपूर्ण कदम बतैलनि। जापान केर प्रधानमंत्री सनाए तकाइचीक संग भारत-जापान वार्षिक शिखर सम्मेलनक बाद हैदराबाद हाउस मे आयोजित एगो संयुक्त प्रेस कॉन्फ्रेंसमे पीएम मोदी कहलनि कि भारत केर विकास यात्रामे जापान हमेशासँ अहम भूमिका निभैलक। जापान केर प्रधानमंत्रीकेँ अपन “छोट बहिन” केर रूपमे संदर्भित करैत ओ कहलनि कि हुनक ई यात्रा भारत-जापान लेल विशेष रणनीतिक आ वैश्विक साझेदारीकेँ एगो नव अध्यायक शुरुआत अछि।

प्रधानमंत्री मोदी कहलनि, “जापानक परिशुद्धता तकनीक आ भारतक सॉफ्टवेयर पराक्रमक अभिसरणसँ आर्टिफिशियल इंटेलिजेंस (एआई) केर वैश्विक विकासमे नव गति आ ताकत भेटत।

जापानक पहिल  महिला प्रधानमंत्री सनाए ताकाइची केर स्वागत करैत पीएम मोदी कहलनि कि ई हुनक भारतक पहिल  आधिकारिक यात्रा अछि।

ओ कहलनि, “प्रधानमंत्री ताकाइची जापानक पहिल महिला प्रधानमंत्री छथि। ओ जापानक नारा प्रान्तसँ आबय छथि आ एगो दूरदर्शी आ लोकप्रिय नेता छथि, जे भारत आ जापानक बीच साझा बौद्ध विरासतक एगो प्रमुख केंद्र अछि।”

ओ हालमे भेल जी-7 शिखर सम्मेलनमे ई कहने छलाह से याद दिलबैत कहलनि जे वैश्विक उथल-पुथलक एही समयमे आपसी विश्वास सबसँ पैघ रणनीतिक संपत्ति अछि आ भारत-जापान संबंध पूरा तरहेँ एही मानक पर खरा उतरैत अछि।

प्रधानमंत्री मोदी कहलनि कि स्वतंत्र, समृद्ध आ नियम आधारित भारत-प्रशांत क्षेत्र दूनू राष्ट्र लेल साझा प्राथमिकता अछि।

ओ कहलनि कि भारत आ जापान एशियाक दू सबसँ पैघ लोकतांत्रिक आ बाजार आधारित अर्थव्यवस्था अछि आ दुनू कतेको नव पहल शुरू कयलक जे पूरा क्षेत्रमे स्थिरता आ समृद्धिक मजबूत नींव राखत। पिछला कतेको दशकसँ जापान भारत केर विकास यात्रामे ऑटोमोबाइल, इलेक्ट्रॉनिक्स आ बहुत रास क्षेत्रमे उल्लेखनीय योगदान देने अछि। एही सहयोगसँ  दूनू राष्ट्रक बीच दोस्ती आ विश्वासक मजबूत आधार बनल अछि।

ओ कहलनि कि प्रधानमंत्री ताकाइची केर एही यात्राक संग दुनू देशक बीच विशेष रणनीतिक साझेदारी एगो नव चरणमे प्रवेश कय रहल अछि।

प्रधानमंत्री मोदी कहलनि दुनू राष्ट्र आर्थिक सुरक्षा लेल एगो संयुक्त रोडमैप तैयार कयलक, जाहि केर तहत सामरिक क्षेत्रौ-जेना कि अर्धचालक, क्वांटम तकनीक आ उन्नत सामग्री आपूर्ति श्रृंखलाकेँ मजबूत कयल जायत। ओ इहो कहलनि जे, ऊर्जा सुरक्षाक संबंधमे सेहो कतेको महत्वपूर्ण फैसला लेल गेल अछि।