तमिलनाडुक सीफूड फैक्ट्रीमे अमोनिया गैस लीकसँ 7 महिलाक मृत्यु, 67 लोक अस्पतालमे भर्ती

तिरुवल्लूर। समदिया
रविदिन तमिलनाडुक पेरियापालयम लग मनजंगरनई केर निजी सीफूड प्रोसेसिंग यूनिटमे अमोनिया गैस रिसावक बाद सात महिलाक मृत्यु भ गेल। पुलिस ई जानकारी देलक। तिरुवल्लूर जिलाधिकारी एस कविता कहलनि कि 67 प्रभावित कर्मीकेँ तुरंत स्थानीय चिकित्सा केंद्र पर जायल गेल। ओ कहलनि कि 46 लोकक इलाज वेल्स अस्पतालमे आ 21 लोकक इलाज वेंकटेश्वर अस्पतालमे कय जा रहल अछि। जिलाधिकारी बतौलनि कि गंभीर रूपसँ प्रभावित नौ लोककेँ एम्बुलेंसक जरिए चेन्नई स्थित सरकारी स्टैनली मेडिकल कॉलेज अस्पताल ल जायल गेल अछि। प्रशासन आ पुलिस एहि घटनाक जांच शुरू कय देलक अछि। पुलिस कंपनीक मालिकक प्रति एफआइआर दर्ज कय गिरफ्तार कय लेलक। प्रारंभिक रिपोर्ट बता रहल अछि जे फैक्ट्रीमे अमोनिया गैस रिसावक कारण दुर्घटना भेल अछि। अधिकारी दुर्घटनाक कारण आ सुरक्षा मानकमे कोनो संभावित चूकक जांच केर आदेश देलनि। एम्हर, घटनाक बाद इलाकामे पुलिस बल तैनात कयल गेल अछि। एही दुखद घटना पर तमिलनाडुक राज्यपाल राजेंद्र आर्लेकर मृतकक परिजनक प्रति संवेदना व्यक्त कयलनि। जनतब देब जे हादसा केर चपेटमे आयल कर्मचारी (मजदूर)मे सँ बेसी उत्तर भारतीय छल। गैसक संपर्कमे अयलासँ सांस लेबामे दिक्कत, चक्कर आ उल्टी जँका समस्या सामने आयल। प्रारंभिक जांचमे सामने आयल जे अमोनिया गैसक रिसाव फैक्ट्रीमे लगाओल गेल मेजर वाल्वसँ भेल।