551 शहर आ 14 अंतर्राष्ट्रीय केंद्र पर 22 लाख परीक्षार्थी लेल आयोजित नीट-यूजी परीक्षा समाप्त
पटना। समदिया
पिछला परीक्षामे पेपर लीक गड़बड़ीक आरोपक बाद अभूतपूर्व सुरक्षा व्यवस्था आ जाँच बढ़लाक बीच काल्हि रविदिन पूरा भारतमे राष्ट्रीय पात्रता-सह-प्रवेश परीक्षा (नीट)- यूजी 2026 केर पुनः परीक्षा आयोजित कयल गेल। भारतक 551 शहर आ 14 अंतर्राष्ट्रीय स्थान पर 5,440 परीक्षा केंद्र पर 22.79 लाखसँ बेसी अभ्यर्थी हाजिर होय केर पात्र छल, जाहिसँ ई देशक सबसँ पैघ प्रवेश परीक्षामेसँ एक बनि गेल अछि। कार्यक्रमक अनुसार परीक्षा एक पालीमे 2:00 बजेसँ 5:15 बजे सांझ धरि भेल। नीट यूजी 2026 प्रश्नपत्रमे भौतिकी, रसायन विज्ञान आ जीव विज्ञानक कुल 180 प्रश्न शामिल छल, 720 अंकक प्रश्न पत्र छल। आब सभ उम्मीदवार रिजल्टक इंतजारमे छथि। देशभरि केर मेडिकल कॉलेजमे एमबीबीएस, बीडीएस आओर आयुश कोर्समे एडमिशन एहि रिजल्टक आधार पर देल जाएत अछि। रिजल्टक संग-संग एनटीए कैटेगरीवार कटऑफ आ ऑल इंडिया रैंक सेहो जारी करत, जे बादमे काउंसलिंग आ सीट आवंटन प्रक्रियाक आधार बनत।केंद्र आ विभिन्न राज्यक अधिकारी परीक्षाकेँ निष्पक्ष, पारदर्शी आ सुचारू संचालन सुनिश्चित करय लेली व्यापक उपाय लागू कयलनि। कोनो तरहक कदाचारकेँ रोकय लेल सुरक्षा प्रोटोकॉल बढ़ल, बहुस्तरीय पुलिस तैनाती, सीसीटीवी निगरानी, सिग्नल जैमर, सख्त फ्रिस्किंग प्रक्रिया आ खुफिया निगरानीक व्यवस्था कयल गेल।केंद्रीय मंत्री रामदास आठवले कहलनि जे, सरकार पहिनेक परीक्षामे भेल गड़बड़ी करय वला विवादकेँ दोहराबयसँ बचय लेल पैघ कदम उठेलक अछि, जखन कि राज्य सरकार आओर कानून प्रवर्तन एजेंसी अभ्यर्थी आओर अभिभावककेँ मजबूत व्यवस्थाक आश्वासन देलक अछि। उत्तर प्रदेश आ दिल्लीसँ ल कय कर्नाटक, गुजरात, त्रिपुरा आ हिमाचल प्रदेश धरि अधिकारी परीक्षा केंद्र पर तैयारीक समीक्षा कय सुरक्षा प्रणालीकेँ मजबूत कय देलनि। प्रश्नपत्र आ उत्तर पत्रकेँ सुरक्षित परिवहन लेल पुलिस टीम तैनात कयल गेल छल, जखन कि साइबर निगरानी इकाई गलत सूचना पर लगाम लगेबा आ परीक्षा प्रक्रियामे बाधा पहुंचेबाक प्रयासकेँ रोकबा लेल सोशल मीडिया प्लेटफॉर्म पर नजरि राखि रहल छल आ अखनो नजरि बनल अछि। अभ्यर्थीक सहायताक लेल रेलवे स्टेशन आ बस स्टैंड पर यातायात प्रबंधन योजना, समर्पित हेल्प डेस्क आ विशेष व्यवस्था सेहो कयल गेल छल। जनतब दी जे नीट-यूजी भारतमे मेडिकल एंट्री लेल परीक्षा अछि, जकर आयोजन राष्ट्रीय परीक्षण सेवा (नेशनल टेस्टिंग एजेंसी -एनटीए) द्वारा सभ साल कराओल जायत अछि।
