धोखाधड़ीक मामिलामे मधुबनीसँ गिरफ्तार टीएमसीक पूर्व प्रत्याशी
मधुबनी। समदिया
पश्चिम बंगाल विधानसभा चुनावमे टीएमसीक उम्मीदवार कैलाश मिश्राकेँ मधुबनीसँ काल्हि बंगाल पुलिस धोखाधड़ीक आरोपमे गिरफ्तार कय लेलक अछि। हुनका पर धोखाधड़ी आ मनी लांड्रिंगक आरोप अछि आ प्रवर्तन निदेशालय (ईडी) द्वारा सेहो ओकर मांग कयल जा रहल अछि।
मधुबनी जिलाक अरेर निवासी आ पश्चिम बंगाल विधानसभा चुनावमे तृणमूल कांग्रेस (टीएमसी) केर उम्मीदवार कैलाश मिश्राकेँ शनिदिन सांझमे बंगाल पुलिस धोखाधड़ीक आरोपमे गिरफ्तार कय लेलक। बेनीपट्टीक एएसपी अमित कुमार गिरफ्तारीक पुष्टि कयलनि। पश्चिम बंगालमे हुनका पर कतेको धोखाधड़ीक आरोप अछि आओर एकटा मामिलामे गैर जमानत वारंट जारी कयल गेल छल। गिरफ्तारीक बाद बंगाल पुलिस हुनका हिरासतमे लेलक।
कैलाश मिश्राकेँ बंगाल पुलिस टीम, मधुबनी पुलिसक सहयोगसँ नाटकीय ढंगसँ गिरफ्तार कयलक। बंगाल पुलिस टीम पहिने मधुबनी पहुंचल। शनिदिन साँझ अरेर आ रहिकाक बीच मुख्य सड़क पर संयुक्त टीम हुनका हिरासतमे लेलक। कैलाश मिश्रा बेनीपट्टी प्रखंडक अरेर पश्चिम टोलाक निवासी छथि।
हुनका पर मनी लांड्रिंग घोटाला सहित कतेको धोखाधड़ीक मामिला दर्ज अछि। प्रवर्तन निदेशालय (ईडी) सेहो हुनक खोजमे लागल छल। बेनीपट्टीक एएसपी अमित कुमार कहलनि जे कैलाश मिश्रक खिलाफ पश्चिम बंगालमे दू-तीन धोखाधड़ीक मामिला दर्ज अछि। आरोप अछि जे ओ बंगालमे मनी लांड्रिंग कयलनि आओर ओहिसँ मिलल आमदनीकेँ बिहारमे लगा देलनी। प्रवर्तन निदेशालय (ईडी) सेहो हुनक खोजमे लागल अछि। एकटा मामिलामे हुनक खिलाफ गैर जमानत वारंट जारी कयल गेल छल। पुलिसक अनुसार कैलाश मिश्र हालहिमे संपन्न पश्चिम बंगाल विधानसभा चुनावमे टीएमसीक उम्मीदवार छलाह। गिरफ्तारीक बाद हुनका आगू केर कानूनी प्रक्रियाक लेल पश्चिम बंगाल ल गेल अछि।
कैलाश मिश्रक गिरफ्तारीक खबरि फैललाक संग बेनीपट्टी अनुमंडलक अरेर प्रखंड आ पूरा मधुबनी जिलामे चर्चा गरम भ गेल अछि। स्थानीय लोक घटनाक विभिन्न पक्ष पर चर्चा कय रहल छथि, आब सभक नजरि पुलिस आ जांच एजेंसीक आगू केर कार्यवाही पर अछि।
