हिरासतमे लेल गेल दुनू गार्ड गिरफ्तार, खान सरसँ पुलिसक पूछताछ
पटना। समदिया
पटनाक खान ग्लोबल इंस्टीट्यूट पर भेल हमलाक मामिलामे एकटा नव मोड़ सामने आयल अछि। फायरिंगक घटनाक वायरल वीडियोक बाद पुलिस खान सर केर दू टा अंगरक्षककेँ गिरफ्तार कय लेलक अछि आ आब खुद खान सरसँ पूछताछ कयल जा रहल अछि।
ओना अखनि धरि उक्त हमलाक ल कय नव खुलासा भ रहल अछि। फिलहाल एहि मामिलाक गहन जांचमे जुटल पटना पुलिस आब खान सरसँ सेहो पूछताछ कय रहल अछि। ई पूछताछ एहन समयमे कयल गेल अछि जखनि पुलिस हुनक दूनू अंगरक्षककेँ गोलीबारीक आरोपमे हिरासतमे ल लेलक आ बादमे गिरफ्तार कय लेलक।
खास तौर पर 2 जूनकेँ खान ग्लोबल इंस्टीट्यूट पर हमलाक दौरान भेल फायरिंगक वीडियो सोशल मीडिया पर वायरल भ गेल। वीडियोमे खान सर केर दुनू अंगरक्षक गोली चलाबैत देखल जा रहल अछि। वीडियो सामने ऐलाक बाद पुलिस मामिलाक जांच गंभीरतासँ शुरू कयलक।
जांचक दौरान पुलिस टीम खान ग्लोबल इंस्टीट्यूट पहुंचि दुनू अंगरक्षककेँ हिरासतमे ल लेलक आ कदमकुआं थाना पहुंच गेल। रिपोर्ट संकेत करैत अछि जे ओतय पूछताछक बाद दुनू व्यक्तिकेँ गिरफ्तार कय लेल गेल।
मीडिया रिपोर्टक अनुसार, फायरिंगमे इस्तेमाल भेल गन सेहो बरामद कय लेल गेल। पूछताछक दौरान दुनू अंगरक्षक फायरिंग करबाक बात स्वीकार कय लेलक अछि। एकर बाद पुलिस आब पूरा घटनाक्रमकेँ ल कय खान सरसँ सेहो सवाल जवाब कय रहल अछि।
एहि मामिलामे खान खान सर पहिने अपन एक महत्वपूर्ण बयानमे बदलाव कय चुकल छथि। हमला वला दिन ओ दावा कयने छलथि जे ओ अपन आँखिसँ करीब 8 सँ 10 राउंड फायरिंग होयत देखलनि आ फायरिंगक कारण इलाकामे अफरातफरी मचि गेल छल। हालांकि, अगिला दिन यानी 3 जूनकेँ ओ कहलनि कि घटनाक समय माहौल बेहद तनावपूर्ण छल आ हुनका पूरा स्थिति स्पष्ट नहि छल। ओ बतौलनि कि अंगरक्षक जे जानकारी देने छल, ओहि केर आधार पर ओ अपन बात कहने छलाह।
खान सर एही मामिलामे सख्त कार्यवाहीका मांग करैत आरोप लगौने छलाह कि हुनक संस्थान लग स्थित ज्ञान बिंदु जी.एस. एकेडमी हमलाक साजिश रचलक। हुनक अनुसार कम फीसमे शिक्षा उपलब्ध कराबयसँ ओ अन्य कोचिंग संस्थानक निशाना पर छथि। ओ इहो दावा कयलनि कि हुनका पहिनेसँ धमकी भेट रहल छल। फिलहाल पुलिस पूरा मामिलाक विभिन्न पहलुसँ जांच कय रहल अछि आ खान सरसँ पूछताछक बाद आगुक कार्यवाहीक दिशा तय होयत।
जनतब दी जे उक्त मामिलामे जखनि एफआईआर लेल आवेदन देल गेल तँ ओहि आवेदनमे खान ग्लोबल इंस्टीट्यूट दिससँ गोलीबारी भेल तकर जिक्र नहि अछि। ज्ञान बिंदु जी.एस. एकेडमीक मुख्य शिक्षक पुलिस हिरासतमे छथि।
