बंगालमे कल्याण बनर्जी पर हमला, बीच सड़क पर घायल भ खसि पड़लाह सांसद
कोलकाता। समदिया
तृणमूल आ भाजपाक बीच भेल झड़पक बाद थानाक बाहर तनावक माहौल बनि गेल अछि। तृणमूल पार्टीकेँ रविदिन चांदीतला थानामे तृणमूलक नेता आ कार्यकर्ताक गिरफ्तारीक विरोधमे ज्ञापन देबय केर छल। निर्धारित आयोजनसँ पहिने सेहो पुलिस स्टेशनक सामने एकटा बेहद तनावपूर्ण माहौल बनि चुकल छल। भाजपा कार्यकर्ता पर तृणमूल कार्यकर्ताकेँ निशाना बना कय “चोर, चोर” केर नारा लगेबाक आरोप लागल अछि। एहि हंगामाक बीच अशांति बढ़ि गेल। सेरामपुरक तृणमूल सांसद कल्याण बनर्जी पर हमला भेल। एहि हमलामे हुनका चोट लागल छल आ खून बहैत छल।
रविदिन तृणमूलक कार्यकर्ता प्रतिनिधिमंडलक हिस्सा केर रूपमे ज्ञापन देबय लेल थाना गेल छलाह। कल्याण बनर्जी स्वयं लोकेशन दिस जा रहल छलाह। सांसद आरोप लगौलनि जे, ओहि क्षण भाजपा कार्यकर्ता हुनका खिलाफ नारा लगौलनि। कारी झंडा लहराओल गेल आओर भाजपा कार्यकर्ता कथित तौर पर हुनका पर शारीरिक हमला कयलक। हमलाक बाद तृणमूल सांसद माथ पकड़ने सड़क पर लेट गेलाह। बादमे पार्टीक सदस्य हुनका उठयमे मदद कयलनि आ माथ पर पानि ढारि देलनि।
सांसद कहलनि, “हम अपना संग ककरो नहि अनलहुँ। हम असगरे चलैत रही कि ठीक ओहि क्षण भाजपा कार्यकर्ता चंदिताला चौराहाक सोझाँ एकटा गेंद फेकि देलक, हमरा नहि बुझल अछि जे ई कोन तरहक गेंद छल, शायद ‘ड्यूस’ गेंद वा किछु आओर। हमर माथसँ खून बहैत अछि।” सिसकैत-सिसकैत आवाजमे माइकमे बजैत सांसद कहलनि जे आब हमरा लग एहिसँ बेसी किछु कहबाक हिम्मत नहि अछि। चंदितालाक जनता कए खुद न्याय करबाक चाही। की संसद सदस्य पर शारीरिक हमला करब जायज अछि? इ कोनो सहज सार्वजनिक प्रकोप नहि अछि। इ मात्र छह-सात व्यक्ति छल, भगवा गमछा पहिरने, तृणमूल कार्यकर्ता संग मारि-पीट कएलक।” ओ आगू कहलनि जे, “हमरा चलैत काल मोटरसाइकिल पर सवार एकटा महिला ओहि ठाम सँ गुजरि गेलीह। ओ हमरा देखि टिप्पणी केलथि जे दादा, भाजपाक लोक अहाँक संग मारि-पीट कयलक अछि।’
जनतब देब जे शनिदिन सोनारपुरमे डायमंड हार्बरसँ तृणमूल सांसद अभिषेक बनर्जी संग सेहो मारपीट भेल छल। एहि बेर कल्याणकेँ चोट लागल अछि आ खून बहैत छल। लगातार दू दिनसँ तृणमूलक दूटा सांसद घायल भ गेल छथि। अशांतिक दबाबय लेल पुलिस आ केंद्रीय बलक भारी टुकड़ी तैनात कएल गेल अछि।
