सांसद गोपालजी ठाकुर सीबीएससी बोर्डमे मैथिली माध्यमसँ पढ़ौनी लागू करेलनि
आब गेंद राज्य सरकारक पालामे, जे ओ सरकारी विद्यालयमे एकरा लागू करय केर आदेश पारित करय
दरभंगा समदिया!! दरभंगा सांसद गोपालजी ठाकुर सीबीएससी बोर्डमे मैथिली माध्यमसँ पढ़ौनीक आदेशक केंद्रीय राज्यमंत्री जयंत चौधरीक पत्र शोसल मिडिया पर शेयर करैत मोदी सरकारकेँ आभार प्रकट कयलनि अछि।
ओ कहलनि, मिथिलाक मातृभाषा मैथिलीकेँ शिक्षा व्यवस्थामे सशक्त स्थान दिआबय केर दिशामे ई एकटा ऐतिहासिक निर्णय अछि। आगू ओ कहलनि, केंद्रीय राज्यमंत्री जयंत चौधरी द्वारा भेजल गेल पत्रक अनुसार नवीन शिक्षा नीति २०२० केर अनुरुप सीबीएससी पाठ्यक्रममे शैक्षणिक सत्र २०२६-२७ सँ माध्यमिक स्तर पर मैथिली विषय केर सम्मिलित कयल गेल अछि।
पत्रमे स्पष्ट रुपसँ कक्षा ०१सँ ०५ वा यथासंभव कक्षा ०८ धरि मैथिलीक माध्यमसँ पढ़ौनीक बात कहल गेल अछि आ एहि लेल एनसीआरटीकेँ पुस्तक उपलब्ध कराबय केर बात अछि। पत्र सांसद गोपालजी ठाकुरक नामसँ अछि।
आगा गोपालजी ठाकुर कहलनि, “ई निर्णय मिथिलाक संस्कृति, भाषा आ अस्मिताकेँ राष्ट्रीय स्तर पर नव पहिचान देबयवाला अछि। एहि लेल पीएम नरेन्द्र मोदी आ केंद्र सरकारकेँ हृदयसँ आभार।”
आगू कहलनि “मिथिला आ मैथिली भाषाक विकास हेतु दृढ़ संकल्पित भऽ निरंतर काज करैत रहब।