बंगालमे जल्द होयत कैबिनेट विस्तार, शुभेंदु अधिकारी पीएम मोदी सहित बीजेपीक नेतासँ कयलनि मुलाकात
नई दिल्ली। समदिया
पश्चिम बंगालक मुख्यमंत्री शुभेंदु अधिकारी प्रधानमंत्री नरेंद्र मोदीसँ काल्हि भेंट कयलनि। मुख्यमंत्री बनलाक बाद हुनक पहिल दिल्ली यात्रा छल। काल्हि शुक्रदिन दिल्लीमे हुनक कतेको कार्यक्रम छल। अधिकारी दुपहरमे प्रधानमंत्रीसँ भेंट कयलनि। ओ हुनका बंकिम चंद्र चटर्जीक फोटो भेंट कयलनि, जाहि पर “वंदे मातरम” लिखल छल। पश्चिम बंगालक मुख्यमंत्री पीएम मोदीकेँ गुलदस्ता सेहो भेंट कयलनि। संभावना अछि जे एहि बैसारमे मंत्रिमंडल विस्तार पर चर्चा भेल। शुभेंदु कैबिनेटक विस्तार जल्दिये कयल जाएत।
जनतब देब जे शुभेंदु अधिकारी 9 मईकेँ मुख्यमंत्री पदक शपथ लेलथि। हुनका संग भाजपाक पांचटा आओर विधायक मंत्रीक रूपमे शपथ लेलनि। बंगालमे कैबिनेट विस्तार लंबित अछि। मानल जा रहल अछि जे एहि बैसारमे मंत्रिमंडल विस्तार पर सेहो चर्चा भेल।
सूत्रक अनुसार भाजपा परम्पराक अनुसार पार्टीक कोनो सदस्य जखन मुख्यमंत्री बनैत छथि तँ प्रधानमंत्रीसँ भेंट करय लेल दिल्ली जाइत छथि। मानल जाइत अछि जे ओहि परंपराक पालन करैत दिल्लीमे शुभेंदु प्रधानमंत्रीसँ भेंट कयलनि।
शुक्रदिन सुवेन्दु अधिकारी दिल्लीमे राष्ट्रपति द्रौपदी मुर्मूसँ सेहो भेंट कयलनि। एकर अलावा ओ नितिन नवीन आ बी.एल. संतोषसँ सेहो मुलाकात कयलनि। पार्टी अध्यक्ष आ केंद्रीय वरिष्ठ नेतासभसँ भेंटक बाद रोडमैप कए अंतिम रूप देल गेल।
शुभेंदु अधिकारी केंद्रीय गृहमंत्री अमित शाहसँ काल्हि सेहो भेंट कयलनि। बैसारक बाद शाह फेसबुक पोस्टमे लिखलनि, “हम पश्चिम बंगालक नवनिर्वाचित मुख्यमंत्री सुवेन्दु अधिकारीसँ भेंट कय हुनक नव जिम्मेदारी पर बधाई देलियैन। पीएम मोदी आ आँहाँक नेतृत्वक मार्गदर्शनमे पश्चिम बंगाल सरकार राज्य केर जनताक कल्याण आ सुशासन लेल समर्पित भ काज करय।”
बादमे ओ रक्षा मंत्री राजनाथ सिंहसँ सेहो भेंट कयलनि। किछु दिन पहिने पश्चिम बंगाल सरकार सीमा सुरक्षा बल (बीएसएफ) कए जमीन सौंपने छल। सीमा पर काँटीदार तार लगेबा लेल 27 किलोमीटरक जमीन बीएसएफ कए सौंपल गेल। सीमा आ बीएसएफसँ जुड़ल मामिला अमित शाहक केंद्रीय गृह मंत्रालयक तहत अछि।
ओना एहिमे राष्ट्रीय रक्षा सेहो शामिल अछि। मानल जा रहल अछि जे शुभेंदु अधिकारी राजनाथ सिंहसँ बीएसएफ कए जमीन सौंपबाक मुद्दा पर चर्चा केलथि। शुभेंदु अधिकारी स्पष्ट रूपसँ बतेलथि अछि जे पश्चिम बंगालमे अवैध तरीकासँ रहनिहार सभकेँ पहिचान कय बीएसएफकेँ सौंपल जाएत। घुसपैठियाकेँ बंगालसँ भगा देल जाएत।
