पोर्टल पर खुलासा, बिहारमे 8 हजारसँ बेसी बच्चा लापता, मात्र 427 रेस्क्यू
पटना। समदिया
बिहारमे मिशन वत्सल्य पोर्टलक अपडेटमे लापता बच्चाक संख्याक खुलासा भेल अछि। सभ थानाकेँ मेंटल हेल्थ केयर एक्ट 2017 केर तहत जानकारी अपलोड करय केर निर्देश देल गेल अछि। मानव तस्करीक खिलाफ ‘नया सवेरा 2.0’ नाम केर अभियान सेहो शुरू कयल गेल, जाहिमे 400सँ बेसी पीड़ितकेँ बचाओल गेल आ कतेको तस्करकेँ गिरफ्तार कयल गेल।
बिहारमे 8 हजारसँ बेसी बच्चा लापता अछि। ई बात मिशन वत्सल्य पोर्टलक अपडेट आ स्क्रीनिंगक दौरान सामने आयल।
खबरि केर अनुसार पुलिस मुख्यालयसँ एसओपी जारी कएल गेल अछि, जाहिमे स्पष्ट कएल गेल अछि जे जँ कोनो बच्चा भेटत तँ ओकर जानकारी डाटाबेसमे अपडेट करय पड़त। पहिने लापता वा हेरायल बच्चाक जानकारी मात्र थानासँ भेटैत छल। जखन पोर्टल शुरू भेल तँ मात्र 3190 बच्चा कय लापता हेबाक सूचना भेटल, मुदा जखन एकर मॉनीटरिंग भेल तँ एक मासक भीतर इ आंकड़ा बढ़ि कए 8681 भ गेल। जनतब देब जे अइ पोर्टलकें मॉनीटरिंग लेल निजी संस्थान आ विश्वविद्यालयकें सहयोगसँ थाना स्तर पर एकटा प्रशिक्षण कार्यक्रम तैयार कयल गेल अछि। 1171 अधिकारीकेँ प्रशिक्षित कयल गेल अछि। एकरा पूरा करबाक जिम्मेदारी सीआईडीक अंतर्गत वीकर सेक्शनकेँ अछि।
राज्य केर एडीजी वीकर सेक्शन द्वारा किछु दिन पहिने ई जानकारी देल गेल छल कि राज्यमे एकसँ 30 अप्रैल धरि मानव व्यापारकेँ खिलाफ नया सवेरा 2.0 अभियान वहलाओल गेल छल। जाहिमे 94 पीडितकेँ मुक्त कराओल गेल छल। एहीमे 46 नाबालिग बच्चा सेहो शामिल छल। एहीमे 20 बच्ची आ 26 बच्चा छल। एही दौरान दू मानव तस्करकेँ सेहो गिरफ्तार कयल गेल।
राज्यमे विभिन्न जिलामे चलय वला आर्केस्ट्रा डांस ग्रुपों पर नकेल कसबाक कवायद कयल गेल अछि। राज्यमे 35 महिला समेत 114 मानव तस्करकेँ गिरफ्तार कयल गेल अछि। नया सवेरा अभियानक दोसर फेजमे 427 पीडितकेँ पूरा राज्यसँ मुक्त कराओल गेल अछि आ 116 मानव तस्करकेँ गिरफ्तार कयल गेल अछि।
