यूएई तट लग एकटा जहाज पर ईरानक कब्जा, ओमानमे हमलाक बाद भारतीय झंडा वाला जहाज डूबल

नई दिल्ली । समदिया

संयुक्त अरब अमीरातक पूर्वी तट लग लंगर डालल एगो जहाज केर अज्ञात लोकसभ जब्त क’ क’ ईरान दिशि ल’ जाय केर खबरि आबि रहल अछि। एहि घटनाक पुष्टि ब्रिटिश सैन्य संगठन यूनाइटेड किंगडम मैरीटाइम ट्रेड ऑपरेशन (यूकेएमटीओ) कयलक। घटनाक बाद पूरा होर्मुज जलडमरूमध्य क्षेत्रमे सुरक्षा एजेंसी सतर्क अछि।

पूरा घटना फुजैरा लग भेल।

यूकेएमटीओ के मुताबिक ई जहाज फुजैरा बंदरगाहसँ लगभग ३८ समुद्री मील (करीब ७० किलोमीटर) उत्तर-पूर्व मे लंगर डालल गेल छलै जखनि एकरा अनधिकृत लोक सभ कब्जा क’ लेलकै। शुरुआती खबरिमे कहल गेल छलै कि जहाज केर जब्त कयलाक बाद ईरानी जल क्षेत्र दिसि बढ़ि गेल छलै। मुदा एखनि धरि जहाजक नाम सार्वजनिक नहि भेल अछि आ ने कोनो समूह एहि कार्रवाई केर जिम्मेदारी लेलक अछि। यूकेएमटीओ कहलक कि ई मामिला केर जांच जारी अछि आ सब संभावित पहलू पर नजरि राखल जा रहल छै।

एम्हर भारतीय अधिकारी सब जानकारी देलनि अछि जे ओमान तट लग भारतीय झंडा वाला मालवाहक जहाज पर हमला भेल छल, जाहि कारण ओ जहाजमे आगि लागि गेल आ बादमे डूबि गेल। ई जहाज सोमालियासँ यूएई केर शारजाह जा’ रहल छल। जहाज पर सवार सब १४ भारतीय चालक दलकेँ ओमान तटरक्षक दल सुरक्षित रूपसँ बचा लेलक । अधिकारीक अनुसार सब नाविक सुरक्षित अछि आ हुनका चिकित्सा सहायता देल गेल अछि। भारतक विदेश मंत्रालय नागरिक जहाज पर जारी हमलाक कड़ा निंदा कयलनि जे ई घटना गंभीर आर अस्वीकार्य अछि।

होर्मुज जलडमरूमध्य दुनिया केर सबसँ महत्वपूर्ण समुद्री मार्गमे सँ एक अछि, जे वैश्विक तेल आपूर्ति केर लगभग एक चौथाई हिस्सा गुजरैत छै। एहेन स्थितिमे एहि क्षेत्रमे कोनो तरहक अस्थिरता केर सीधा असरि वैश्विक ऊर्जा बाजार पर पड़ैत छैक। एहि घटना सभक बीच पश्चिम एशियामे राजनीतिक तनाव पहिनेसँ चरम पर अछि।