ट्रंप कहलनि- अमेरिका-चीन संबंध वैश्विक शक्ति संतुलनक रीढ़, व्हाइट हाउसक आमंत्रण

नई दिल्ली । समदिया

अमेरिकाक राष्ट्रपति डोनाल्ड ट्रंप चीन दौरा क’ दौरान अमेरिका आ चीनक संबंधकेँ विश्व इतिहासक सभसँ महत्वपूर्ण संबंधमे सँ एक बतौलनि। ओ कहलनि जे दुनू देशक लोकक बीच सम्मान आ सहयोगक भावना अमेरिका स्थापना कालसँ कऽ रहल अछि।

बीजिंगमे आयोजित कार्यक्रमकेँ संबोधित करैत ट्रंप कहलनि जे अमेरिका आ चीनक नागरिकक बीच शुरूसँ आपसी सम्मानक गहरा संबंध रहल अछि। ओ अमेरिकाक संस्थापक नेता सभक जिक्र करैत कहलनि जे बेंजामिन फ्रैंकलिन अपन औपनिवेशिक समाचार पत्रमे चीनी दार्शनिक कन्फ्यूशियसक विचार प्रकाशित कयने छलाह। ट्रंप ईहो कहलनि जे आइयो अमेरिकी सुप्रीम कोर्ट भवन पर प्राचीन चीनी विद्वान सभक मूर्ति गर्वसँ स्थापित अछि।

अमेरिकाक राष्ट्रपति डोनाल्ड ट्रंप बृहस्पतिकेँ घोषणा कएलनि जे चीनी राष्ट्रपति शी जिनपिंग आगामी 24 सितंबरकेँ व्हाइट हाउसक दौरा करताह। ट्रंप कहलनि जे ई एकटा पारस्परिक आधिकारिक यात्रा होयत। अपन संबोधनमे ओ शी जिनपिंग आ हुनकर पत्नी पेंग लियुआनकेँ अमेरिका आबय लेल निमंत्रण दैत कहलनि जे ओ सितंबरमे हुनकर स्वागत लेल उत्साहित छथि।

ट्रंप अमेरिका-चीन संबंधकेँ “गहरा आ पुरान” बतबैत कहलनि जे दुनू देशक लोकक बीच संबंध अत्यंत महत्वपूर्ण अछि। ओ एहि बैठककेँ सकारात्मक आ विशेष अनुभव सेहो बतौलनि।

एकटा चीनी अधिकारीक अनुसार दुनू नेता एहि बात पर सहमत भेलाह जे दुनियाक ऊर्जा जरूरत पूरा करबाक लेल हॉर्मुज जलडमरूमध्य खोलब जरूरी अछि। ई समुद्री मार्ग ईरान आ अमेरिका-इस्राइल संघर्षक कारण नमहर समयसँ प्रभावित अछि।

शी जिनपिंग एहि मार्ग पर कोनो प्रकारक टैक्स अथवा टोल लगाबयक विरोध कएलनि। अधिकारीक अनुसार चीन भविष्यमे अमेरिकासँ बेसी तेल खरीदयमे रुचि देखा रहल अछि, जाहिसँ खाड़ी देश सभ पर निर्भरता कम कएल जा सकय।

बैठकमे फेंटानिल जेकाँ नशीला पदार्थ बनाबयमे उपयोग होमय वाला रसायनक सप्लाई रोकय पर सेहो चर्चा भेल। एकर अतिरिक्त अमेरिकासँ कृषि उत्पादक खरीद बढ़ाबय पर सेहो बात भेल।

ट्रंप कहलनि जे अमेरिका आ चीनक संबंध अमेरिका स्थापना कालसँ जुड़ल अछि। ओ बतौलनि जे 1784 मे अमेरिकाक पहिल कॉन्सुल सैमुअल शॉ चीन पहुँचल छलाह, जखनि पहिल अमेरिकी व्यापारिक जहाज चीन आयल छल।

ट्रंप कहलनि जे ओहि समयसँ ल’ क’ आइ धरि दुनू देशक संबंध लगातार मजबूत भेल अछि आ ई वैश्विक इतिहासक प्रभावशाली संबंधमे सँ एक बनि गेल अछि।

बीजिंगमे भेल बैठकक जिक्र करैत ट्रंप कहलनि जे अमेरिकी आ चीनी प्रतिनिधिमंडलक बीच बातचीत बहुत सकारात्मक आ उपयोगी रहल। ओ कहलनि, “आइ हमर चर्चा बहुत उपयोगी आ नीक माहौलमे भेल। भविष्यमे सेहो एहन संवाद जारी रहबाक चाही।”

चीनी राष्ट्रपति शी जिनपिंग अमेरिकी राष्ट्रपति ट्रंपकेँ स्पष्ट चेतावनी देलनि जे ताइवान मुद्दाकेँ गलत ढंगसँ संभारल गेल त’ अमेरिका आ चीनक बीच गंभीर टकराव, एतय तककि सैन्य संघर्षक स्थिति उत्पन्न भ’ सकैत अछि।

ई बयान एहेन समयमे आयल अछि जखनि दुनियाक दुनू सबसँ पैघ अर्थव्यवस्था व्यापार, ऊर्जा सुरक्षा, ईरान युद्ध आ वैश्विक रणनीतिक संतुलन जेकाँ संवेदनशील मुद्दा पर बातचीत क’ रहल अछि।