30 दिनक भीतर शिकायतक निपटारा होय, नहि तँ 31म दिन अधिकारी स्वतः निलंबित
पटना। समदिया
सोमदिन (11 मई, 2026) मुख्यमंत्री सम्राट चौधरी सहयोग शिविरसँ संबंधित सहयोग हेल्पलाइन नंबर 1100 आ सहयोग पोर्टल (sahyog.bihar.gov.in) रियल टाइम मॉनिटरिंग सिस्टमक उद्घाटन केलथि। आब जमीनी स्तर पर शिकायत कय 30 दिनमे निपटारा भ सकैत अछि।
एहि अवसर पर मुख्यमंत्री सम्राट चौधरी कहलनि जे “सबका सम्मान जीवन आसन” निश्चय केर तहत बिहार सरकार आम नागरिकक समस्याकेँ प्रभावी आ समय पर समाधानक लेल लगातार प्रयासरत अछि। हम सभ निर्णय लेलौं जे पंचायत स्तर पर सहयोग शिविरक आयोजनसँ 30 दिनक भीतर समस्याक समाधान भ जायत।
मुख्यमंत्री कहलनि जे जिला मजिस्ट्रेट आ पुलिस अधीक्षक रियल टाइम मॉनिटरिंग करत। सहयोग शिविरमे प्रतिनियुक्त अधिकारी 30 दिनक भीतर सार्वजनिक समस्या केर शीघ्र, निष्पक्ष आ पारदर्शी समाधान सुनिश्चित करताह। एही लेल सभ र महीनाक पहिल आ तेसर मंगल दिन पूरा बिहारक सभ पंचायतमे सहयोग शिविर कार्यक्रमक आयोजन कयल जाएत।
मुख्यमंत्रीक कहनाय छनि जे जँ संबंधित अधिकारी 30 दिनक भीतर आवेदनक प्रक्रिया आओर आदेश पास करयमे विफल रहय छथि, फाइलमे देरी करताह वा एहि मामिलामे लापरवाही देखाबय छथि तँ 31म दिन स्वतः निलंबित भ जयताह।
मुख्यमंत्री अधिकारी सभसँ आग्रह कयलनि जे जँ सड़क, बिजली, पानि आदिसँ जुड़ल कोनो विकास कार्य वा कोनो बुनियादी सार्वजनिक जरूरत अछि तँ सरकार तदनुसार निर्णय लेत। मुदा, जौं निचला स्तर पर, ब्लॉक, जोन वा थानासँ संबंधित कोनो समस्या उठय तँ 30 दिनक भीतर ओकर समाधान करय पड़त। सम्राट चौधरीक कहनाय छनि जे आईटी विभाग एखन सभ ब्लॉक, जोन आओर थानामे सीसीटीवी कैमरा लगा कय ओतय केर गतिविधि पर नजरि राखि रहल अछि। ओ इहो कहलनि जे, 11 नंबर केर शुभ मानल जाइत अछि। आइ 11 तारीख अछि आ सहयोग हेल्पलाइन नंबर सेहो 11 सँ शुरू होइत अछि, एहि शुभ समय पर शुभ कार्य शुरू भ रहल अछि।
मुख्यमंत्री कहलनि जे जा धरि आवेदन प्राप्ति बंद नहि भ जाएत ता धरि इ सहयोग शिविर जारी रहत। एकर प्राथमिक उद्देश्य अछि जे लोकक समस्याक समाधान जल्दसँ जल्द भ सकय।
