बिहारमे बुलडोजर कार्यवाही, अतिक्रमण कय बनल मकान हटेनाइ जरूरी

पटना। समदिया

उपमुख्यमंत्री विजय चौधरी कहलनि जे सम्राट चौधरी सरकारी जमीन पर बनल अपन घरक सीढ़ी तोड़ि एकटा मिसाल कायम कयलनि अछि। दोसरोकेँ एकर अनुसरण करबाक चाही।

बिहारमे फेरसँ बुलडोजरक कार्यवाही शुरू भ गेल अछि। पटनाक दुजरा इलाकामे दूटा पैघ भवनकेँ तोड़य लेल चिन्हित कएल गेल अछि। मुख्यमंत्री सम्राट चौधरी साफ-साफ कहने छथि जे सरकारी जमीन पर घर बनत तँ ओकरा तोड़ब जरूरी अछि। एहि बुलडोजर कार्यवाहीक संबंधमे केंद्रीय मंत्री चिराग पासवान सुझाव देलथि अछि जे कार्यवाही हेबाक चाही, मुदा वैकल्पिक रहबाक व्यवस्था सेहो हेबाक चाही। मंगलदिन (28 अप्रैल 2026) चिराग पासवानक बयान पर जदयू सेहो प्रतिक्रिया देलक।

जनता दल यूनाइटेड (जदयू) केर वरिष्ठ नेता आ उपमुख्यमंत्री विजय कुमार चौधरी चिराग पासवानक बयानक समर्थन कयलनि। ओ कहलनि जे इ सरकारक नीति अछि। जँ ककरो घर तबाह भ रहल अछि आ एकटा आश्रय स्थल बचल अछि तँ सरकारकेँ पहिने वैकल्पिक आवासक व्यवस्था करय पड़त।

विजय कुमार चौधरी कहलनि जे, चिराग पासवान एकदम सही कहैत छथि, मुदा जे सरकारी जमीन पर अतिक्रमण कयने छथि हुनका खाली करबाक चाही। मुख्यमंत्री सेहो ई बात कहने छथि आ ई स्वागत योग्य अछि।

जदयू नेता कहलनि जे, मुख्यमंत्री सम्राट चौधरी सेहो कहने छथि जे हुनक घरक सीढ़ी सरकारी जमीन पर बनल छल, ताहि लेल ओ ओकरा तोड़ि देने छथि। ओ उत्तम उदाहरण प्रस्तुत कयने छथि आ दोसरोकेँ सेहो अनुसरण करबाक चाही।

दोसर दिस उपमुख्यमंत्री विजय कुमार चौधरी सेहो बंगाल चुनाव पर प्रतिक्रिया देलनि। ओ कहलनि जे, बंगाल चुनावमे तेजस्वी यादव आ ममता बनर्जीक एक संग प्रचारक कोनो असर नहि पड़त। बंगालक जनता तंग आबि गेल अछि।