जानकी नवमीकेँ फोरमक बैसारमे मैपुप्र केर ऑन लाइन चर्चा-परिचर्चाक शुभारम्भक लेल गेल संकल्प

मधुबनी, निज समदिया!! जानकी नवमीक अवसर पर शनि दिन मधुबनी स्थित मैथिल पुनर्जागरण प्रकाश फोरमक कार्यालयमे एकटा महत्वपूर्ण बैसार भेल। पटनासँ आएल फोरमक ट्रस्टी संरक्षक डॉ. विनय कर्ण, मैथिल पुनर्जागरण प्रकाशक मैथिली बुलेटिन प्रस्तोता – श्रेष्ठ समाचार वाचक पुरस्कारसँ सम्मानित सुमित सौरभक उपस्थितिमे फोरमक प्रमुख पं. अजयनाथ झा शास्त्री द्वारा मैथिल पुनर्जागरण प्रकाश केर ‘ऑन लाइन चर्चा-परिचर्चा’क शुभारम्भक संकल्प लेल गेल।

एहि महती बैसारमे मैथिल पुनर्जागरण प्रकाश फोरम, राष्ट्रीय मैथिली दैनिक, मैथिली बुलेटिन, मिथिलाक्षर साक्षरता अभियान, कौशल विकास कार्यक्रम, शिक्षण-प्रशिक्षण योजना, आदि मै पु प्र फोरमक विभिन्न प्रकल्पक संचालन एवं गति-प्रगति पर व्यापक विचार-विमर्श भेल। विदित होए कि रोजगारपरक शिक्षण-प्रशिक्षण हेतु एहिठाम एखनि युवा सभकें कौशल्य प्रदान कएल जा रहल अछि। एहि संस्थानसँ प्रशिक्षित युवा सभकें रोजगारक अनेक अवसर प्राप्त भs सकैछ।

अजय नाथ शास्त्रीक कहब छन्हि कि 12-13 वर्षसँ निरन्तर प्रयास करैत रहलाक ई परिणाम अछि जे आइ फोरम बनल आ क्रियाशील अछि। लिपिक पुनर्जागरणमे मातृलिपि मिथिलाक्षरक पुनर्जागरण, बादमे मातृभाषा मैथिलीक पुनर्जागरण हेतु राष्ट्रीय मैथिली दैनिकक रूपमे ‘मैथिल पुनर्जागरण प्रकाश’ अखबारक प्रकाशन आरम्भ भेल। ई दुनू तs असंभव सन काज भेले अछि। तकर बाद ‘मिथिलाक पहिचान मिथिलाक्षर निशान’ सेहो आरम्भ भेल। एखनि कम्प्यूटरक डीसीए कोर्स आदि हेतु शिक्षण-प्रशिक्षणक काज सेहो शुरू अछि। डाॅ विनय कर्ण आगू कहलनि जे गुरूजीकें विश्वास छन्हि जे आगू सफलता भेटबे करत।

एहि बैसारमे उपस्थित सुमित सौरभकेँ अभिनन्दन करैत पं. अजय नाथ झा शास्त्री मैथिली बुलेटिन केर निरंतरता साल भरिसँ बेसी समयसँ बनाकए रखबाक लेल साधुवाद देलनि। अंतमे पाँच वर्षसँ निरन्तर प्रकाशित भs रहल मैथिल पुनर्जागरण प्रकाश एवं एक वर्ष सँ बेसी समयसँ निरन्तर प्रसारित भs रहल मैथिली बुलेटिन द्वारा सफलताक नव प्रतिमान गढ़य केर इतिहास रचबाक लेल डॉ. विनय कर्ण गुरूजीकें हार्दिक बधाई एवं अशेष शुभकामना देलखिन्ह।