मंदिर निर्माणादिसँ जँ हम थोड़बो पुण्यक भागी, तऽ तकर फल मिथिलावासीकेँ भेटय : डाॅ. संदीप एन झा

बनौरघाट स्थित कमला मैयाक विधिवत पूजन कयलनि माँ सहित बाबूजी पं. नित्यानन्द झा

मधुबनी समदिया!! विदित अछि जे सिजौल गाममे विगत् 21 अप्रैलसँ भक्ति, निष्ठा एवम् सनातन धर्मक जयघोष निनादित भऽ रहल अछि जे 26 अप्रैल धरि अनवरत् चलैत रहत। श्री राम जानकी मंदिर प्राण प्रतिष्ठापन महोत्सवक शुभारंभक पहिल दिन ऐतिहासिक कलश यात्राक संग भऽ चुकल अछि। हजारों कलश यात्री एवम् कांवर यात्री बनौरघाट स्थित पवित्र कमला नदीसँ जल भरि मंदिर परिसरमे स्थापित कय छह दिवसीय मूर्ति प्राण प्रतिष्ठापन महोत्सवक शुभारंभ कयलनि।

मुख्य यजमान बाबूजी पं. नित्यानन्द झा सपत्नी द्वारा विधानपूर्वक कमला नदीक पूजन कयल गेल। एहि अवसर पर डाॅ. संदीप झाजी उद्गार व्यक्त करैत कहलनि, “भक्ति, श्रद्धा एवम् आध्यात्मक केन्द्र अछि मिथिला। विद्वता, धार्मिकता एवम् आध्यात्मिक सूचिताक लेल विख्यात मिथिलाक भूमि अत्यन्त पावन अछि। कमला नदीक पवित्र तट पर उपस्थित विशाल संख्यामे श्रद्धालुजन आह्लादित छथि। एक तरफ सिजौल शिक्षा मंदिरक रूपमे विख्यात भऽ चुकल अछि दोसर मंदिर निर्माणक संग आध्यात्मक संदेश दैत यशस्वी भऽ रहल अछि।”

डाॅ. झा आगू कहलनि, “जँ हम एवम् परिवार थोड़बोक पुण्य कयने होय तऽ एकर लाभ समस्त मिथिलावासीकें प्राप्त होन्हि इएह भगवती जानकीसँ प्रार्थना अछि।”

डाॅ. झा कहलनि प्राचीन भारतक इतिहास बिहारक इतिहास अछि तहिना प्राचीन बिहारक इतिहास मिथिलाक इतिहास थिक। एहेन पूण्यमय अवसर पर इएह संदेश दैत प्रभुकें प्रार्थना करब जे मिथिलाकें बेरोजगारी एवम् पलायनसँ मुक्त कराबथि। मिथिला अपन पूर्ण ऐश्वर्यकें प्राप्त करय। जनतब दी कि करोड़ों रूपया खर्च कय डाॅ. संदीप झा द्वारा मंदिरक निर्माण कराओल गेल अछि।

मैथिलीक दैनिक राष्ट्रीय अखबारक प्रणेता पं. अजयनाथ झा शास्त्री अपन टीमक संग आयोजन स्थल पर पहुँचि दिव्य महोत्सवमे उपस्थिति दर्ज करौलनि। मंदिरक निरीक्षणक संग-संग साधुग्राम पहुँचि व्यवस्थाक अवलोकन कयलनि। तत्पश्चात संदीप विश्वविद्यालयक चेयरमैन डाॅ. संदीप झाक संग साक्षात्कार करैत आयोजन संबंधित विभिन्न पहलू पर विस्तारपूर्वक चर्चा कयलनि। तहिना बाबूजी पं. नित्यानंद झा, प्रेमचंद्र झा, जयमाधव झा सहित उपस्थित ग्रामीण सभसँ चर्चा कयलनि स़गहि भूतपूर्व मुखिया विश्वजीत चौधरीसँ सेहो विस्तृत चर्चा कयलनि।

मूर्ति प्राण प्रतिष्ठापन महोत्सव केर अवसर पर स्थानीय जनमानसक संग-संग देशक विभिन्न प्रान्तसँ श्रद्धालुजनक उपस्थितिक समाचार अछि। नगर परिभ्रमणक कार्यक्रमक संग-संग विविध कार्यक्रम क्षेत्रवासीकें चमत्कृत कऽ रहल अछि। मूर्ति प्राण प्रतिष्ठापन समितिक छह दिवसीय कार्यक्रमक सफल आयोजनक लेल कमेटीक गठन कयलक अछि। कमिटिक सदस्यगण उत्साहित भऽ प्रत्येक गतिविधि पर गहींर नजरि रखने छथि। प्रशासन सेहो तत्परतापूर्वक महोत्सवकें सफल बनेबामे योगदान दऽ रहल अछि। देशक अन्य क्षेत्रसँ पहुँचल संतजनकें रहबाक व्यवस्था आदिक निरीक्षण स्वयं डाॅ. संदीप झा कऽ रहल छथि।