सरोकार ट्रस्ट द्वारा मलंगिया महोत्सव – 2026 लेल नाट्य प्रस्तुतिक जोरदार तैयारी

आगामी 24 सँ 28 अप्रैल धरि दिल्ली स्थित गाँधी स्मृति प्रतिष्ठानमे मलंगिया महोत्सवमे 35टा नाटकक मंचन होएत, जाहिमे 27 अप्रैलकेँ सरोकार ट्रस्ट झंझारपुर द्वारा ‘लेभराह अन्हारमे एकटा इजोत’ नाटकक होएत मंचन

झंझारपुर । समदिया

अनुमंडल क्षेत्रक मिथिला दीप गाम स्थित सरोकार ट्रस्ट द्वारा आगामी 27 अप्रैलकेँ ‘मलंगिया फाउंडेशन’ एवं संस्कृति मंत्रालय भारत सरकार द्वारा आयोजित मलंगिया महोत्सवमे प्रसिद्ध नाटककार महेंद्र मलंगिया लिखित एकांकी ‘लेभराह अन्हारमे एकटा इजोत’ केर प्रस्तुति प्रसिद्ध रंगकर्मी समीर कुमारक निर्देशनमे कएल जाएत।

सरोकार ट्रस्टक चंद्रभूषण झाक अनुसार आगामी 24 सँ 28 अप्रैल धरि दिल्ली स्थित गाँधी स्मृति प्रतिष्ठानमे मलंगिया महोत्सवक आयोजनमे 35टा नाटकक मंचन होएत, जाहिमे देश-विदेशक कलाकार एवं नाटककार सभक द्वारा महेंद्र मलंगिया लिखित 35टा नाटकक मंचन कएल जायत।

एहि महोत्सवमे झंझारपुरक मिथिला दीप स्थित सरोकार ट्रस्टकें नाट्य मंचनक लेल आमंत्रित कएल गेल अछि जे एहि अनुमंडलक लेल  गौरवक बात अछि। जनतब दैत चन्द्रभूषण झा केर कहब छन्हि कि गाममे स्कूल भवन निर्माण हेतु जमीनक व्यवस्था हेतु संघर्षरत शिक्षक केर विवशता आओर ग्रामीण सभक द्वारा सहयोगक उपेक्षाक चित्रण मलंगिया महोत्सव केर भव्य मंचक अनुरूप तैयार कएल जा रहल अछि। विगत एक सप्ताहसँ नवानी गाममे चलि रहल रिहर्सल सत्रमे निर्देशक समीर कुमार द्वारा नाटकक बारीकी पर विशेष ध्यान देल जा रहल अछि।

जनतब दैत चली कि एहि नाटकक मंचन मलंगिया महोत्सवमे  27 अप्रैल 2026 केँ शफीक सभागार, नई दिल्लीमे संध्या 5 बजेसँ होयब निर्धारित अछि। नाटकक प्रस्तुति प्रबंधक कुमार अमित बतौलन्हि कि झंझारपुर अनुमण्डल केर अलग-अलग गामसँ आएल कलाकार सभमे वैश्विक रंगमंच पर उत्कृष्ट प्रदर्शन हेतु एकटा अलगे उत्साह देखल जा रहल अछि। झंझारपुरक समृद्ध नाट्य परम्पराकें पुनः जीवंत करबाक एकटा स्वर्णिम अवसर मानि एकरा सफल बनेबामे कलाकार सभ  राति-दिन मेहनत कs रहल छथि।

निर्देशक समीर कुमार कहैत छथि कि सरोकार ट्रस्टक दिशिसँ मंचित होमय जा रहल एहि नाटकक प्रस्तुति मलंगिया महोत्सव केर प्रतिष्ठित मंच पर भेनाइ  हमरा सभक लेल अत्यन्त गौरवक बात थिक। ओ ईहो कहैत छथि कि हम सभ अपन उत्कृष्ट प्रदर्शनसँ नाटकक सन्देशकें जौं दर्शक तक पहुँचा सकी आओर झंझारपुरमे रंगमंचीय गतिविधिकें आगू बढ़ा सकी तs ई हमर सरोकार ट्रस्टक एकटा उपलब्धि होयत।

प्रस्तुत नाटकमे प्रकाश परिकल्पना चंद्रभूषण झा, संगीत डॉ. संजीव शमा आओर निर्देशन समीर कुमार केर छन्हि। नाटकक प्रमुख कलाकारमे समीर कुमार, अक्षज अक्षित, लोहिताक्ष दर्शित, इन्द्र कुमार, सुबोध कुमार, अजय कुमार दास पिन्टू, बरसाती मंडल, कुमार अमित आदिक नाम उल्लेखनीय अछि।