नीतिश कुमारकेँ पीएम मोदी शुभकामना दैत कहलनि – ‘एक बेर फेर संसदमे देखब बहुत सुखद
नई दिल्ली । समदिया
प्रधानमंत्री नरेंद्र मोदी शुक्रकेँ बिहारक मुख्यमंत्री नीतिश कुमारकेँ राज्यसभाक सदस्यक रूपमे शपथ लेला पर शुभकामना देलनि। पीएम मोदी नीतिश कुमारक प्रशंसा करैत कहलनि जे ओ बिहारक विकासमे अमिट योगदान देलनि अछि। हुनका एक बेर फेर संसदमे देखब बहुत सुखद होएत।आगू ओ कहलनि जे, हमरा पूरा विश्वास अछि जे नीतिश कुमारक नमहर राजनीतिक अनुभवसँ संसदक गरिमा आरो बढ़त।
पीएम मोदी सोशल मीडिया प्लेटफॉर्म एक्स पर लिखलनि, ”नीतिश कुमारजी देशक सबसँ अनुभवी नेता सभमे सँ एक छथि। सुशासनक प्रति हुनकर प्रतिबद्धता केर हरदम सराहना भेल अछि। ओ बिहारक विकासमे अमिट योगदान देने छथि। हुनका एक बेर फेर संसदमे देखब बहुत सुखद होएत। सांसद आ केंद्रीय मंत्रीक रूपमे सेहो ओ कतेको वर्ष धरि अपन सेवा देलनि। हमरा पूरा विश्वास अछि जे हुनकर नमहर राजनीतिक अनुभवसँ संसदक गरिमा आरो बढ़त। राज्यसभा सांसदक रूपमे शपथ लेबय पर हुनका हार्दिक अभिनन्दन आ आगाँक कार्यकालक लेल बहुत रास शुभकामना।”
बिहारक मुख्यमंत्री नीतीश कुमार राज्यसभाक सदस्यक रूपमे शपथ लेलनि। नई दिल्लीमे राज्यसभाक सभापति आ उपराष्ट्रपति सीपी राधाकृष्णन हुनका उच्च सदनक सांसदक रूपमे शपथ दियौलनि। एहि अवसर पर राज्यसभामे नेता सदन आ केंद्रीय मंत्री जेपी नड्डा, वित्त मंत्री निर्मला सीतारमण, कांग्रेसक जयराम रमेश, जेडीयू आ भाजपा नेता उपस्थित छलाह।
एकर संगहि पीएम मोदी हरिवंश नारायण सिंहकेँ राज्यसभाक सदस्य बनला पर शुभकामना देलक। पीएम मोदी सोशल मीडिया प्लेटफॉर्म एक्स पर लिखलनि, ”हरिवंशजी पत्रकारिता आ सार्वजनिक जीवनमे अमूल्य योगदान देने छथि। ओ एकटा सम्मानित बुद्धिजीवी आ विचारक छथि। हुनकर गहन विचार आ अंतर्दृष्टिसँ विगत किछु वर्षमे सदनक कार्यवाही समृद्ध भेल अछि। हमरा खुशी अछि जे माननीय राष्ट्रपतिजी हुनका राज्यसभाक लेल मनोनित कयलनि। आगामी संसदीय कार्यकाल लेल हुनका हमर ढेर-ढेर शुभकामना।”
बीतल किछु वर्षोंसँ हरिवंश नारायण राज्यसभाक उपसभापति रहलाह। हुनकर कार्यकाल पूरा भेला पर हुनका राज्यसभाक लेल मनोनित कयल गेल अछि। केंद्रीय गृह मंत्रालय एकटा अधिसूचना जारी कऽ एकर जानकारी देने छल।
