बिहारमे नव सरकार आ नव मुख्यमंत्रीक तैयारी, 10 अप्रैलकेँ दिल्लीमे बीजेपी केर पैघ बैसार

पटना । समदिया

बिहारमे फेर सियासी हलचल तेज भ’ गेल अछि। मुख्यमंत्री नीतीश कुमारक सियासी उत्तराधिकारी चुनएकेँ कवायद आब जोर पकड़ि रहल अछि। एह बीच भारतीय जनता पार्टी (बीजेपी) 10 अप्रैलकेँ दिल्लीमे एगो महत्वपूर्ण बैठक बजौने अछि, जतय नव सरकार गठन आ नव मुख्यमंत्रीक नाम पर अंतिम फैसला लेल जाएत।

ई बैठक बीजेपीक राष्ट्रीय अध्यक्ष नितिन नवीनक अध्यक्षतामे होएत। एहिमे बिहार बीजेपी कोर ग्रुपक प्रमुख नेता आ दिल्लीक शीर्ष नेतृत्व शामिल रहत। बैठकक मुख्य उद्देश्य बिहारमे नव सरकारक गठन आ मुख्यमंत्रीक नाम पर सहमति बनायब अछि।

बैठकमे प्रदेश अध्यक्ष संजय सरावगी, उपमुख्यमंत्री सम्राट चौधरी आ विजय कुमार सिन्हा उपस्थित रहताह। एकरा अलावा नित्यानंद राय, संजय जायसवाल, क्षेत्रीय संगठन महामंत्री नागेंद्र आ प्रदेश संगठन महामंत्री भीखू भाई दलसानिया सेहो शामिल हेताह। एहि संग बिहार सरकारक मंत्री दिलीप जायसवाल आ मंगल पांडेयकेँ सेहो आमंत्रण देल गेल अछि।

बैठकमे बीजेपी आलाकमान द्वारा प्रदेश कोर कमेटीसँ मुख्यमंत्रीक नाम मांगल जा सकैत अछि। पार्टी एहेन चेहराकेँ आगु बढ़ाबयकेँ कोशिशमे अछि, जाहि पर सब पक्षक सहमति होए आ जे पार्टीकेँ बिहारमे आरो मजबूत बना सकए। अंतिम निर्णय राष्ट्रीय नेतृत्व द्वारा लेल जाएत।

सूत्रक अनुसार मुख्यमंत्री नीतीश कुमार 10 अप्रैलकेँ दिल्लीमे राज्यसभा सदस्यताक शपथ लेताह। एकरा बाद ओ पटना घुरि 12 यवा 13 अप्रैलक आसपास राज्यपालकेँ अपन इस्तीफा दऽ सकैत छथि।

एहि राजनीतिक गतिविधिक बीच नीतीश कुमारक पुत्र निशांत कुमार कहलनि जे बीतल दू दशकमे हुनकर पिता द्वारा कएल गेल काजकेँ जनता कखनो नहि बिसरत। ओ जनतासँ जेडीयू आ हुनकर पिताकेँ समर्थन बनौने रखबाक अपील कयलनि। किछु कार्यकर्ता हुनका संभावित उत्तराधिकारीक रूपमे सेहो देखि रहल छथि, हालांकि पार्टी द्वारा एखनि धरि कोनो आधिकारिक घोषणा नहि भेल अछि।

जेडीयू मंत्री विजय चौधरी कहलनि जे मुख्यमंत्री नीतीश कुमार राज्यसभा सदस्य निर्वाचित भ’ गेल छथि आ दिल्ली जा क’ शपथ लेताह। हुनकर अनुसार, मुख्यमंत्रीक इस्तीफाक बाद एनडीएकेँ सभ दल बैसि आपसी सहमतिसँ नव सरकारक गठन करत।