‘आइ राति एकटा सभ्यता खत्म भ’ सकैत अछि’ : ट्रंपक ईरानकेँ निर्णायक चेतौनी

नई दिल्ली । समदिया

अमेरिकाक राष्ट्रपति डोनाल्ड ट्रंप मंगलकेँ फेर ईरानकें कड़गर चेतौनी देलनि। ओ कहलनि जे “आइ राति एकटा पूरा सभ्यताक अंत भ’ सकैत अछि, जेकरा फेर जीवित नहि कएल जा सकत।”

राष्ट्रपति ट्रंप अपन सोशल मीडिया प्लेटफॉर्म ‘ट्रुथ सोशल’ पर लिखलनि, “आइ (मंगल) राति एकटा पूरा सभ्यताक अंत भ’ सकैत अछि। हम एहेन नहि चाहैत छी, मुदा शायद एहेन होय।”

ओ आगू कहलनि जे आब एहेन स्थिति बनि रहल अछि जतए सत्ता परिवर्तन भ’ सकैत अछि आ कम कट्टरपंथी आ बेसी समझदार लोक सत्तामे आबि सकैत छथि, त’ किछु सकारात्मक आ अद्भुत सेहो भ’ सकैत अछि।

मंगलकेँ ट्रंप कहलनि जे “आइ राति दुनियाक इतिहासक सभसँ महत्वपूर्ण क्षण सभमे सँ एकटा होएत। 47 वर्षसँ चलि रहल जबरदस्ती, भ्रष्टाचार आ हिंसाक अंत भ’ सकैत अछि।” ओ ईरानक जनता लेल भगवानसँ कृपा करबाक कामना सेहो कएलनि।

ई बयान ओहि समय आयल अछि जखनि अमेरिका आ इस्राइल ईरानक खर्ग द्वीप पर कतेको हमला कएलक अछि। एहि केर अलावा कोम शहर लग एकटा पुलकेँ सेहो निशाना बनाओल गेल अछि।

दोसर दिसि, ईरानक इस्लामिक रिवोल्यूशनरी गार्ड कॉर्प्स (IRGC) अमेरिकाकेँ ‘लक्ष्मण रेखा’ पार नहि करबाक चेतौनी देने अछि। कोम प्रांतक उप-राज्यपाल मोर्तेजा हेदरी पुष्टि कएलनि जे अमेरिका आ इस्राइल कोम शहर लग एकटा पुल पर हमला कएलक अछि।

प्राप्त जानकारीक अनुसार, इस्राइल काशान शहरमे रेलवे पुल पर हमला कएलक अछि, जाहिमे दू गोटेकेँ मृत्यु भ’ गेल अछि। ई हमला यहया आबाद रेलवे पुल पर भेल।

इस्फहानक उप-राज्यपाल सेहो एहि घटनाक पुष्टि कएलनि। इस्राइली सेना पहिने चेतावनी देने छल जे नागरिक सभ साँझ 9 बजे तक ट्रेन यात्रा नहि करथि। मशहद शहरमे रेल सेवा सेहो अचानक रोकि देल गेल अछि।

अमेरिकाक उपराष्ट्रपति जेडी वेंस कहलनि जे आब फैसला ईरानक हाथमे अछि। ओ कहलनि जे “जंगसँ पहिने सेहो ईरान बातचीतमे तेज नहि छल, आ आब त’ आओर कठिन भ’ गेल अछि।” वेंस कहलनि जे राति 8 बजे तक ईरानसँ जवाबक उम्मीद अछि।

ओ आगू कहलनि जे अमेरिका एहेन दुनिया चाहैत अछि जतए तेल आ गैसक आपूर्ति बिना बाधा जारी रहय, लोक अपन घरकें आरामसँ चला सकय आ यातायातक खर्च उठा सकय।

एहि घटनाक्रमसँ मध्य-पूर्वमे तनाव आओर बढ़ि गेल अछि आ पूरा दुनिया एकर अगिला डेग पर नजरि राखि रहल अछि।