सीएम नीतीश कुमारक इस्तीफे पर बेटा निशांतक साधल प्रतिक्रिया

पटना समदिया

निशांत कुमार पूजन-अर्चना लेल दुर्गा मंदिर पहुँचला छलाह. एतयसँ जखनि बाहर निकललाह तऽ मीडियासँ बातचीत कयलाह। पत्रकार सभ नीतीश कुमारक इस्तीफा लेल सवाल कएलनि जाहि पर निशांत साधल उत्तर देलाह।  बिहारक मुख्यमंत्री नीतीश कुमार बीतल सोमकेँ (30 मार्च, 2026) एमएलसी केर पदसँ इस्तीफा देलनि। एही पर आब बेटा निशांत कुमारक प्रतिक्रिया सामने आयल अछि। मंगलकेँ (31 मार्च, 2026) निशांत शहरक एकटा दुर्गा मंदिरमे पूजन-अर्चना करए लेल पहुँचल छलथि, एतयसँ जखनि ओ बाहर निकललाह तऽ मीडियाक सवालक उत्तर देलाह। निशांत कुमारसँ मीडिया पुछलक जे नीतीश कुमार इस्तीफा (एमएलसी पद सँ) देलनि अछि।पूरा बिहार भावुक अछि, अहाँ की कहब ? एहि पर निशांत मीडियासँ कहलाह, “पिताजी निर्णय लेने छैथ, हम स्वीकार करैत छी। जनताक स्नेह-प्रेम जहिना पिताजी पर बनल छल, तहिना हमरापर आ पार्टी पर बनल रहय। ईहे कामना करैत छी।”  दोसर दिसि नालंदामे मचल भगदड़ आ श्रद्धालु सभक मृत्यु पर निशांत दुख व्यक्त कयलनि अछि। ओ एक्स पर पोस्टमे लिखने छथि, “बिहारशरीफक शीतला माई मन्दिरमे भगदड़क घटना मर्माहत कऽ देबयवाला अछि। एहि दुर्घटनामे अपन जान गवाबय वला सभ श्रद्धालुक परिवाक प्रति अपन संवेदना प्रकट करैत छी। सरकार द्वारा मृतकक परिवारकेँ 6-6 लाख केर अनुग्रह राशि देल जा रहल अछि। घायल सभक सही उपचारक सेहो व्यवस्था कयल गेल अछि।” बतयबाक जरूरत अछि जे निशांत कुमार पार्टीमे शामिल भेलाक बाद लगातार राजनीतिमे सक्रिय नजरि अबैत छथि। पार्टीक नेता सभक संग बैठक करैत छथि। आगूक रणनीति सेहो बना रहल छथि। दोसर दिसि जँ नीतीश कुमार सीएम नहिं रहलाह तऽ तैयो ओ अपन पार्टीक राष्ट्रीय अध्यक्ष रहताह। एहेनमे ई तय अछि जे पार्टीक अंतिम फैसला एखनि नीतीशे कुमार लेताह। सभ किछु हुनकर हाथमे रहत। नीतीश कुमारक पार्टीमे रहयसँ निशांतकेँ सेहो राजनीतिक पाठ सिखबाक मौका भेटैत रहत।