श्री श्री 1008 अयुत चंडी महायज्ञक तैयारी हेतु भेल मंथन

मधुबनी । समदिया

आगामी श्री श्री 1008 अयुत चंडी महायज्ञक सफल आयोजनक तैयारी हेतु मधुबनी जिलांतर्गत रहिका प्रखंडक सौराठ आ पोखरौनीक मध्य यज्ञक तैयारी हेतु यज्ञ स्थल पर एकटा बैसार पुनः आयोजित कयल गेल। बैसारक अध्यक्षता प्रमोदानंद झा(झमन) ने कयलनि। बैसारमे उपस्थित सनातन धर्मावलीक मध्य महायज्ञक उद्देश्य,आयोजनक तैयारी एवं एकरा भव्य बनाबय हेतु विस्तारसँ चर्चा कयल गेल। समितिक गठन कयल गेल। पंडितक व्यवस्था एवं आर अनेक प्रकारक तैयारी हेतु विचार कयल गेल। वक्तागण कहलनि कि एहि प्रकारक धार्मिक अनुष्ठान समाजमेंआध्यात्मिक चेतना, आपसी भाईचारा एवं लोककल्याणक भावनाकेँ मजबूत करैत अछि। बैसारमे कतेको गामसँ अनेकानेक सनातन प्रेमी उपस्थित रहथि। सभ एकजुट भऽ महायज्ञकेँ सफल बनाबय हेतु हर संभव सहयोग देबाक संकल्प लेलनि। संगहि क्षेत्रक श्रद्धालु सभसँ अपील कयल गेल कि ओ अधिकाधिक संख्यामे उपस्थित भऽ पुण्यक भागी बनथि। बैसारक अंतमे यज्ञ कमिटीक सचिव आर्यन काश्यप उपस्थित सभ गोटेकेँ आभार व्यक्त करैत कहलनि कि सभक सहयोगसँ ई महायज्ञ पूरा क्षेत्रक लेल आध्यात्मिक ऊर्जा एवं उत्साहक केंद्र बनत एवं ई यज्ञ पूरा मिथिलामे एकटा कीर्तिमान सेहो स्थापित करत। यज्ञ हेतु पैघ स्तर पर मूर्ति निर्माणक काज भऽ रहल छल। मैपुप्र समदिया मूर्ति सबहक नामादिक बारेमे दरबान मूर्तिकार मोहन कुमार मंडल, विकास यादव, मदन मंडल, मनीष कुमार, आदित्य कुमारक संग मोहन आर्टक टीमसँ चर्चा कयलनि। ओ लोकनि मुर्ति सभक नाममे क्रमशः देवीक विभिन्न रुप, तहिना रामायणसँ सीता-राम विवाह, सबरी मिलन,बाली-सुग्रीव युद्ध, लव-कुश लीला, राम दरबार, बजरंग बलीक 20 फीटक मूर्ति आ तहिना महाभारतसँ बरबरीक श्री कृष्ण द्वारा वध, भीष्म पितामहक शरसय्या, वीर अभिमन्यु वध, द्रोपदी चीर हरण, कृष्ण लीला, पुतना वध, कृष्ण जन्मोत्सव, राधा-कृष्ण मिलन, बकासुर वध, वैष्णो देवीख ८ फीटक प्रतिमा, काली प्रतिमा, गणेश, कार्तिक,शिव, पार्वती, लक्ष्मी, सरस्वती, ब्रह्मा, विष्णु, नारद, ऋषि मुनि यज्ञ करैत तहिना राजा हरिश्चन्द्रक श्मशान निवासक दृश्य, श्रवण कुमारक अपन माता-पिताकेँ तीर्थ लऽ जयबाक दृश्य आदिक बारेमे बतेलनि। उक्त बैसारमे सुमन कुमार झा, श्रीपति चौधरी, प्रफुल्ल चंद्र झा, उमेश कुमार राम, कुमार गौरव, समीर ठाकुर,भरत साह, श्यामानंद झा, विजय श्री टून्ना, विजय कुमार झा, सनत, फिरन झा,शंकर झा, मगन ठाकुर, नारायण मिश्रा, आशीष झा, मदन झा, टेक नाथ झा,समेत कतेको लोक उपस्थित छलथि।