‘मिथिलाक पहिचान मिथिलाक्षर निशान’ संकल्प अभियानक भेल शानदार शुरुआत
प्रेरणासँ अजय मेडिकल स्टोर पूरा बोर्ड मिथिलाक्षरमे लगाबय लेल भेलथि सम्मानित
*
मधुबनी समदिया!! मिथिलाक दृश्य पहिचानक लेल तिला संक्रांति 2026, बुध दिनसँ संकल्प अभियान ‘मिथिलाक पहिचान मिथिलाक्षर निशान’क शानदार शुरुआत भेल। मिथिलाक्षर साक्षरता अभियानी मधुबनीक १३ नंबर गुमटीसँ सौराठ सभागाछी धरि ‘दस ठाम पर १४ निशान’ लगौलनि आ चौदहो बोर्ड पर स्थानक नाम मिथिलाक्षरमे लिखौलनि।
विशेप ई जे बैनर-पोस्टर, साउंड आदिक संग मधुबनीक गुमटीसँ यात्रा निकलि सौराठ सभागाछी धरि चौदहो ठाम प्रचार सभा भेल आ अभियानीगण अपन ओजस्वी वाणीसँ प्रेरणा जगौलनि। जय मिथिलाक्षर, जय मैथिली, जय मिथिला, जय हिन्द, भारत माता की जय, वन्दे मातरम्, ‘सिखय बच्चा बुढ़ जवान मिथिलाक्षर साक्षरता अभियान’, ‘खखरीसँ बिछय धान मिथिलाक्षर साक्षरता अभियान’ आदि नारा सभसँ पुरा सड़क गुंजायमान रहल आ लोकक ध्यान आकृष्ट कयलक।
मिथिलाक्षर साक्षरता अभियानक संस्थापक अजय नाथ झा शास्त्री कहलनि, जे मिथिलाक दृश्य पहिचानक लेल ई अभियान अछि, मिथिलावासीमे प्रेरणा जगाबय लेल ई प्रत्यक्ष अभियान अछि, मिथिलावासीकेँ अपन भाषा, लिपि आ संस्कृतिक प्रति स्वाभिमान जगाबय लेल ई अभियान अछि। जखनि सभ सार्वजनिक स्थानक नाम, बैनर, पोस्टर, दुकान, संस्थान सभक बोर्ड पर मिथिलाक्षरमे जानकारी अंकित रहतै तऽ ई स्वतः मिथिलाक निशानक रुपमे दृष्टिगोचर हेतै आ जेना बंगाल, आसाम, पंजाब, महाराष्ट्र, गुजरात, दक्षिण आदिक राज्यमे प्रवेश करिते ओतय केर स्थानीय लिपिमे लिखल देखि ओहि राज्यमे प्रवेशक भान होइत अछि, तहिना मिथिलो केर ई पहिचान देत, मिथिलाक अस्तित्वक भान कराओत, लोकमे स्वाभिमान जागत आ ओ अपन प्राचिन भाषा-लिपि पर गौरव करताह।”
आगू शास्त्री एकर उद्देश्यक पूर्ति हेतु समस्त व्यवसायी, दोकानदार, संस्थान, प्रतिष्ठान सभक मालिकसँ आग्रह कयलनि जे दृश्य पहिचानक उदाहरण तऽ एकटा प्रेरणा जगाबय लेल प्रस्तुत कयल गेल अछि, असली उद्देश्यक पूर्ति तखनि हेतै, जखनि अहाँ सभ मिथिलाक्षरमे बोर्ड लगेबै।”
खुशीक गप्प जे एकर रुझान सेहो भेटल आ सौराठ सभागाछीक ‘अजय मेडिकल स्टोर’ पूरा बोर्ड मिथिलाक्षरमे लगौलनि आ एहि लेल अभियानीगण तकर मालिक अभय कान्त झाकेँ ओतहि पाग आ दोपट्टासँ सम्मानित कयलखिन। मिथिलाक्षर साक्षरता अभियानक संस्थापक अजय नाथ झा शास्त्री सहित समस्त अभियानीगण हुनक अभिनंदन करैत सम्मानित कयलखिन आ एहिना सभसँ बोर्ड लगाबय लेल आह्वान कयल गेल।
प्रचार सभाकेँ विवेक चन्द्र मिश्र, इन्द्रदेव चौधरी, बमबम मिश्र, नवल किशोर कुमार महतो, मालती मिश्र, कुंदन आनंद आदि संबोधित कयलनि।
प्रचार यात्रामे क्रमशः पुष्पेन्द्र ठाकुर, सुभाष कुमार टुन्ना, संजय झा, राकेश कुमार दास, कुंदन आनंद, संजय कुमार मिश्र, शुभ नारायण मिश्र, धर्म कान्त मिश्र, ओम प्रकाश दास सहित अनेकानेक स्वाभिमानीजन छलथि।
चौदह निशान अर्थात जाहि स्थानक बोर्ड मिथिलाक्षरमे अंकित भेल ताहिमे
गुमटी चौक (०१ निशान), गौशाला चौक (०२ निशान), चभच्चा मोड़ (०२ निशान), मीना बाजार (०२ निशान), सप्ता (०१ निशान), जगतपुर चौक (०१ निशान), जगतपुर (०१ निशान), मिठौली (०१ निशान), मिथिला चित्रकला संस्थान (०१ निशान), सौराठ सभागाछी (०२ निशान) रहल। सभठाम प्रचार सभा भेल।
