सुमित सौरभ चयनित भेलथि ‘श्रेष्ठ मैथिली समाचार वाचक सम्मान : २०२५ लेल

निज समदिया!! मैथिल पुनर्जागरण प्रकाश (राष्ट्रीय मैथिली दैनिक) केर समाचार बुलेटिन प्रायः आठ-नौ महिनासँ प्रसारित होइत आबि रहल अछि आ खुब चर्चामे सेहो अछि। चर्चा मुख्यतः समाचार वाचनक आकर्षक आवाज आ शैलीकेँ लऽ कऽ अछि।

जनतबक अनुसार मैथिल पुनर्जागरण प्रकाशकेँ मेल, व्हाट्स एप, फेसबुक आदि विभिन्न माध्यमसँ एहि संक्षिप्त बुलेटिनक साधल संपादन, आकर्षक वाचन एवं उत्कृष्ट शैलीक प्रस्तुतिक प्रसंशा प्राप्त होइत रहल अछि। एकर संपादन एवं वाचनक श्रेय जाइत छनि सुमित सौरभकेँ।

फलतः मैथिल पुनर्जागरण प्रकाश फोरमक उपक्रम ‘मैथिल पुनर्जागरण प्रकाश (राष्ट्रीय मैथिली दैनिक)’ केर समाचार बुलेटिनमे उत्कृष्ट समाचार वाचनक लेल सुमित सौरभकेँ ‘श्रेष्ठ मैथिली समाचार वाचक सम्मान : 2025’ लेल चयनित कयल गेल अछि। ई एखनि धरि लगभग 250 समाचार बुलेटिनक संपादन एवं प्रस्तुति दैत अपन वाचन शैलीक डंका बजौने छथि।

‘मैथिल पुनर्जागरण प्रकाश फोरम’क तत्वावधानमे रांचीमे दिनांक २६-१२-२०२५ केँ होबयवाला ‘मैथिल पुनर्जागरण प्रकाश (राष्ट्रीय मैथिली दैनिक) केर पाँचम स्थापना दिवस समारोहमे सुमित सौरभ सम्मानित हेताह।