मिथिलाक्षर साक्षरता अभियानक दिल्ली युनिटक भेल आनलाईन बैसार

*
संभावित बैसार दिल्लीमे ३१ अगस्तकेँ
*
आनलाईन समदिया
*
मिथिलाक्षर साक्षरता अभियान मिथिलाक्षरक प्रसारमे गति देबय लेल विभिन्न ठामक सांगठनिक युनिटक गठन कय रहल अछि। एहिक्रममे राज्यक राजधानी पटनाक बाद आब राष्ट्रीय राजधानी दिल्लीक युनिटक गठन पर काज चलि रहल अछि। दिल्लीमे हजारोंक संख्यामे मिथिलाक्षर साक्षरता अभियानी छथि। दिल्ली युनिटक गठनक लेल बुधक रात्रिमे एकटा आनलाईन बैसार भेल जाहिमे संस्थापक अजय नाथ झा शास्त्री समेत अनेको अभियानी भाग लेलथि आ उत्साहपूर्वक अभियानकेँ गति देबा लेल तत्पर भेलथि।

दिनांक २०/०८/२०२५, बुधक रात्रिमे मिथिलाक्षर साक्षरता अभियानक दिल्ली एन.सी.आर. आभियानी गणक एकटा आनलाईन बैसारक आयोजन कयल गेल। जाहिमे दिल्ली एन सी आरक अलगसॅं एकटा युनिट बनय, जाहिसॅं दिल्ली एन सी आर केर सब क्षेत्रमे आओर लोक धरि मिथिलाक्षर पहुंचि सकय ताहि लेल विशेष चर्चा भेल। मिथिलाक्षर सिखबाक लेल विशेष तरहसॅं जन-जनसॅं सम्पर्क स्थापित कय, हुनका मिथिलाक्षर साक्षरता अभियानमे जोड़ब आ एहि लेल कार्यशाला सहित आर भिन्न-भिन्न उपक्रम करबा पर जोर देल गेल। एकटा विशेष पोथीकेँ मिथिलाक्षरमे लिप्यंतरण करब आ ओकरा पोथीक रूपमे प्रकाशित करय पर सेहो चर्चा भेल। संगहि संग आर अनेक विन्दु पर चर्चा भेल आ दिल्लीमे एकटा आफलाईन बैसार संभावित ३१ अगस्तकेँ करय केर नियार भेल।

एहि बैसारमे मिथिलाक्षर साक्षरता अभियानक संस्थापक अजय नाथ झा शास्त्री स्वयं शामिल भय बैसारक संचालन कयलनि। संगहि अभियानक वरिष्ठ एवं नव सदस्य अधिकाधिक संख्यामे सम्मिलित भेलाह/भेलीह।

सम्मिलित सदस्य सभमे राघव मिश्र, रुनू मिश्रा, शंभु नाथ झा, देवेन्द्र झा, नरेश दास, जटा शंकर झा, प्रदीप कुमार, सुधीर ठाकुर, राजेश ठाकुर, अनीता मिश्रा, अश्विनी कुमार, डाॅ गोपाल कुमार झा, ज्योति झा, मिथिलेश झा, आभा झा, रविन्द्र कुमार राय, डाॅ डेजी कुमारी, कृति, नलिन, राहुल कुमार, संजय मिश्रा, संगीता,सुधीर यादव, रणवीर कुमार, सुनील कुमार, सुमित कुमार, दत्ता आशुतोष आदि अपन-अपन विचार रखलनि।

३१ अगस्तकेँ होबयवला दिल्लीमे बैसारमे दिल्ली एनसीआरक जिला अनुसार टीमक गठन होएत एवं अभियानीगणकेँ पद आदिक जिम्मेदारी देल जाएत।

मिथिलाक्षर साक्षरता अभियान