भारत आ ओमानक बीच व्यापक व्यापार समझौताक बातचीत पूरा भऽ गेल अछि। सरकार ई जानकारी राज्यसभामे देल गेल जवाबमे देलक अछि। भारत आ ओमानक बीच व्यापार समझौता पर वार्ता साल 2023 मे शुरू भेल छल।
वाणिज्य आ उद्योग राज्य मंत्री जितिन प्रसाद राज्यसभामे कांग्रेस सदस्य हेबी माथेर हिशाम द्वारा पूछल गेल एकटा सवालक लिखित जवाबमे कहलनि कि ‘भारत-ओमान व्यापक आर्थिक साझेदारी समझौता (सीईपीए) पर वार्ता पूरा भऽ गेल अछि।
वाणिज्य आ उद्योग राज्य मंत्री जितिन प्रसाद लिखित जवाबमे कहलनि कि ‘भारत आ ओमानक दोस्ती आ सहयोगक एकटा लम्बा इतिहास अछि, जे आपसी विश्वास आ सम्मानक आधार पर आधारित अछि आ दुनू देशक लोकक बीच सदियोंसँ मजबूत संबंध अछि। ई दूनू देश सामरिक भागीदार अछि आ 1955 मे कूटनीतिक संबंध केर स्थापनाक बादसँ दूनू देशक बीच द्विपक्षीय व्यापार आ निवेशक संबंध लगातार फलैत-फूलैत रहल अछि। दुनू देशक बीच द्विपक्षीय संबंध साल 2008 मे रणनीतिक साझेदारीमे बदलि गेल। मुदा सरकार अखनो धरि ई नै बतेलक कि भारत आ ओमानक बीच मुक्त व्यापार समझौता पर हस्ताक्षर करै केर औपचारिक कार्यक्रम कहिया आयोजित कयल जायत।
एकर अलावा जितिन प्रसाद संसदक उच्च सदनकेँ जानकारी देलनि कि भारत पिछला पांच सालमे अपन व्यापारिक संबंधकेँ मजबूत कयलक आ एही दौरान पांच पैघ मुक्त व्यापार समझौता (एफटीए) पर हस्ताक्षर कयल गेल अछि। संगहि, बहुत रास नव समझौता पर वार्ता चलि रहल अछि। पिछला 5 सालमे हस्ताक्षरित मुक्त व्यापार समझौतामे वर्ष 2021 मे लागू भारत-मॉरिशस व्यापक आर्थिक सहयोग आ साझेदारी समझौता, 2022 मे भारत-यूएई व्यापक आर्थिक साझेदारी समझौता आ 2022 मे भारत-ऑस्ट्रेलिया आर्थिक सहयोग आ व्यापार समझौता, वर्ष 2024 मे भारत-यूरोपीय संघ मुक्त व्यापार आ आर्थिक साझेदारी समझौता आ वर्ष 2025 मे भारत-यूके व्यापक आर्थिक एवं व्यापार समझौता अछि।
भारत-यूरोपीय संघ केर मुक्त व्यापार आ आर्थिक साझेदारी समझौता एही सालक अंतमे लागू होबय केर उम्मीद अछि। भारत-यूके समझौता सेहो एखनि धरि लागू नहि भेल अछि। एम्हर भारत भारत-यूरोपीय संघ मुक्त व्यापार समझौता (एफटीए), भारत-ऑस्ट्रेलिया व्यापक आर्थिक सहयोग समझौता, भारत-श्रीलंका आर्थिक आ प्रौद्योगिकी सहयोग समझौता, भारत-पेरू मुक्त व्यापार समझौता, भारत-चिली मुक्त व्यापार समझौता, भारत-न्यूजीलैंड मुक्त व्यापार समझौता आ अमेरिकाक संग द्विपक्षीय व्यापार समझौता सहित कतेको अन्य समझौता शामिल अछि।
