कांग्रेसक पूर्व जिलाध्यक्ष सह प्रदेश प्रतिनिधि प्रो. शीतलांबर झा प्रेस विज्ञप्ति जारी कय कहलनि अछि जे मधुबनी जिलाक नाम पर सभ विकासात्मक कार्यकेँ एकटा साजिशक तहत झंझारपुर वा ओकर आसपास शिफ्ट करय केर की औचित्य अछि।
मधुबनी जिलाक मेडिकल कॉलेज, पॉलिटेक्नीक कॉलेज, मिथिला हाट , औद्योगिक क्षेत्र सहित कतेको महत्वपूर्ण संस्थाकेँ ओम्हरे अर्थात झंझारेपुर दिसि लगाओल गेल अछि।
प्रो शीतलांबर झा मुख्यमंत्रीसँ आग्रह कयलनि अछि कि जँ मधुबनी जिलाक नाम पर सभ संस्थाकेँ झंझारपुर एवं ओकर आसेपास लगेबाके अछि तऽ हमसभ सेहो अहाँकेँ कतेको बेर पत्राचार एवं अपन मांग पत्रमें झंझारपुरकेँ जिला बनाबय केर मांग कयलौंह अछि तऽ अहाँ किएक नहिं जिला घोषित करैत छी, अहाँ तऽ सर्व शक्तिमान छी।
प्रो झा आगू कहलनि, एखनि मधुबनी जिलाक लेल केंद्रीय विद्यालयक स्थापना कयल जाएत जे चीर-परिचित मांग हमर सभक रहल अछि, तकरा सेहो साजिशक तहत बिहार शिक्षा विभाग झंझारपुर अनुमंडलमे जिलाधिकारीसँ प्रतिवेदन मांगल जा रहल अछि, ई तऽ सरासर अन्याय आ अत्याचार अछि। मुख्यमंत्रीजीकेँ मधुबनीक संसदीय क्षेत्र एवं ओकर आसपासक लोक सभसँ की नाराजगी अछि जखनि कि सभ विधायक एवं सांसदो बीजेपी एवं जेडीयू केर अछि। की एतय केर लोक सभकेँ सुखाड़े एवं अकालेसँ लड़य लेल छोड़ि देल गेल अछि।
प्रो झा मधुबनीक सांसद, मधुबनी , बिस्फी , बेनीपट्टी, हरलाखी , राजनगर एवं खजौलीकेँ अकर्मण्य एवं निष्क्रीय घोषित कयलनि अछि जे मात्र अपन उल्लू सीधा करयमे लागल रहैत अछि आ अपन इलाकाक उपेक्षो भेला पर डरसँ चुप बैसल अछि।
ओ कहलनि कि जनता आब जागरूक भऽ गेल अछि, आबय वाला समयमे सभ विधायक सभसँ सेहो हिसाब लेत, अन्यथा समय रहैत अपन चुप्पी तोड़थि आ सरकार पर दबाव डालथि जो केंद्रीय विद्यालय मधुबनीक आसपास स्थापित कयल जा सकय, जखनि कि ओकर आसपास जमीनक कोनो कमी नहि अछि। रामपट्टी ,कपिलेश्वर स्थान , बेनीपट्टी, राजनगर पंडौल आदि जगह पर जमीन उपलब्ध अछि, जँ नहियों अछि तऽ मधुबनीक आसपास सरकार जमीन अधिग्रहण कय केंद्रीय विद्यालय लगाबय।
प्रो झा सरकार आ जिला प्रशासनकेँ चेतावानी दैत कहलनि अछि कि जँ मधुबनीक आसपास केंद्रीय विद्यालय नहिं लागत तऽ मधुबनी संसदीय क्षेत्र एवं ओकर आसपासक लोक सभकेँ संगठित कय जोरदार आंदोलन होएत जकर जवाबदेही सरकार एवं जिला प्रशासनक होएत।
प्रो झा सभ राजनीतिक दल एवं सामाजिक संस्थासँ सेहो कहलनि अछि कि कुंभकर्णी निद्रा तोड़ि जनहितमे आवाज बुलंद करी।
