वैशाली जिलाक गंगा ब्रिज थाना क्षेत्रक अंतर्गत मुंगराही चौक केर समीप शुक्रदिन भोरमे एकटा दुखद सड़क दुर्घटना भेल। जंदाहासँ आबय वाला मालवाहक गाड़ी हाजीपुर दिसि जा रहल छल, तखने सड़कक कातमे ठाढ़ ट्रकसँ टकरा गेल। टक्कर एतेक भयंकर छल जे गाड़ीमे सवार दू गोटेके मौका पर मृत्यु भs गेल, जखनि कि एक गोटे गंभीर रूपसँ घायल भs गेल।
घटनाक सूचना मिलैत देरी स्थानीय लोक भारी संख्यामे जमा भs गेल आ तुरंत डायल 112 पर पुलिसकेँ सूचना देलक, पुलिस मौका पर पहुंचि स्थानीय थाना केर सूचना देलक, जकर बाद गंगा ब्रिज थाना केर टीम सेहो मौका पर पहुंच गेल। पुलिस तुरंत घायल केर हाजीपुर सदर अस्पतालमे भर्ती करा देलक, जतयसँ हुनकर हालत गंभीर भेला पर पटना पीएमसीएच रेफर कs देल गेल।
प्राप्त जानतवक अनुसार मालवाहक गाड़ीमे तीन गोटे छल, जे सब आगूक सीट पर बैसल छल। मृतकक पहिचान एखन धरि नहि भs सकल अछि। पुलिस शवकेँ अपन कब्जामे लs कs पोस्टमार्टमके लेल सदर अस्पताल पठा देलक अछि आ स्थानीय लोकसँ पहिचानक लेल पूछताछ कएल जा रहल अछि. पुलिस मृतकक पहिचान आ परिवारकेँ जानकारी देबयमे जुटल अछि।
गंगा ब्रिज थाना केर पुलिस अधिकारी कहलनि जे, ई सड़क दुर्घटना अछि जाहिमे दू गोटे केर मृत्यु भs गेल अछि आ एकटा घायल भs गेल अछि। शवक पहिचान भेलाक बाद आवश्यक कारवाई कएल जाएत।
