मालदीवक राजधानी माले केर रिपब्लिक स्क्वायर पर शुक्रदिन प्रधानमंत्री नरेंद्र मोदीक औपचारिक स्वागत समारोह आ गार्ड ऑफ ऑनर देल गेल। ओ मालदीव केर दू दिनक राजकीय यात्रा पर पहुंचल छथि। एहि अवसर पर मालदीवक राष्ट्रपति मोहम्मद मुइज्जू सेहो मौजूद छलाह।
समारोह केर दौरान बच्चा सब पारंपरिक नृत्य प्रस्तुत कय पीएम मोदी केर स्वागत कयलक। एकर बाद दुनू नेताक बीच द्विपक्षीय वार्ता भेल। एहि दौरान माले स्थित रक्षा मंत्रालय भवनकेँ पीएम मोदीक सम्मानमे पीएम मोदीक तस्वीरसँ सजाओल गेल। ओकर पैघ तस्वीर बिल्डिंग पर लगायल गेल।
एहिसँ पहिने राष्ट्रपति मोहम्मद मुइज्जू स्वयं हवाई अड्डा पहुंचि प्रधानमंत्री मोदीक गर्मजोशीसँ स्वागत कयलनि। एहि दौरान मालदीव केर विदेश मंत्री, रक्षा मंत्री, वित्त मंत्री आओर गृह सुरक्षा मंत्री सेहो मौजूद छलाह।
पीएम मोदी सोशल मीडिया प्लेटफॉर्म ‘एक्स’ पर पोस्ट करैत कहलनि जे, “माले पहुंचलौंह। स्वयं राष्ट्रपति मुइज्जू द्वारा हवाई अड्डा पर आबि स्वागत कयलासँ हम अभिभूत छी। हमरा पूरा विश्वास अछि जे भारत-मालदीव दोस्ती आगामी समयमे प्रगतिक नव ऊंचाईकेँ छूअत।”
कुरुंबा विलेज रिज़ॉर्ट पहुँचला पर बच्चा सब पारंपरिक शास्त्रीय नृत्यक प्रदर्शन कयलक। एकटा बच्चा कहलक, “हम ई पेंटिंग अपन माँ केर मददिसँ बनौने रही। हमरा विश्वास नै छल जे प्रधानमंत्री वास्तवमे एही पर ऑटोग्राफ देताह। जखनि ओ हस्ताक्षर कयलनि तँ हम खुशीसँ कूदि गेलहुं!”
पीएम मोदी अपन एक्स पोस्टमे भारतीय समुदाय केर संग अपन मुलाकातक तस्वीर शेयर कय लिखलनि कि, “भारत आ मालदीवक बीच दोस्तीकेँ मजबूत करयमे भारतीय प्रवासी केर अहम भूमिका अछि। हम हुनक गर्मजोशीसँ स्वागत लेल आभार व्यक्त करैत छी।”
शनिदिन पीएम मोदी मालदीवक 60म स्वतंत्रता दिवस समारोहमे मुख्य अतिथिक रूपमे शामिल हेताह। मालदीव केर ई हुनक तेसर यात्रा अछि आ राष्ट्रपति मुइज्जू केर पदभार संभाललाक बाद कोनो राष्ट्राध्यक्षक पहिल आधिकारिक यात्रा अछि।
