केंद्रीय मंत्री लल्लन सिंह चुनाव आयोग द्वारा हालमे उठाओल गेल कदम केर प्रशंसा करैत कहलनि जे एहिसँ देशक लोकतंत्रक जड़ि आओर मजबूत होएत। ओ कहलनि जे, निर्वाचन आयोगक ई कदम लोकतंत्रकेँ मजबूत करत आ अवैध मतदाताक आधार पर सत्ता प्राप्त करबाक प्रयास बंद करत।
ललन सिंह कहलनि जे निर्वाचन आयोग स्पष्ट कय देलक अछि जे संविधानक अनुसार एहि देशक नागरिक मात्र मतदाता भऽ सकैत अछि। आयोग चारिटा मानदंड तय कयलक अछि। पहिल, नागरिकता प्रमाणपत्र केवल एहि देशक नागरिककेँ देल जाए। दोसर, जे लोक अस्थायी रूपसँ विदेशमे रहैत छथि हुनका मतदाता सूचीमे शामिल नहि हेबाक चाही। तेसर, दू ठाम मतदाता सूचीमे जिनकर नाम दर्ज अछि ओकर नाम नहि हेबाक चाही, एक ठामसँ नाम हटा देल जायत आ हुनका इ अधिकार देल जयबाक चाही जे ओ मतदाताक रूपमे कतय पंजीकृत रहय चाहैत छथि। चरिम, जिनकर मृत्यु भऽ चुकल अछि हुनक नाम मतदाता सूचीसँ हटाएल जाए।”
ओ सवाल उठेलनि जे, “निर्वाचन आयोगक कोन कदम लोकतंत्रकेँ कमजोर कय रहल अछि ? इ सबटा कदम लोकतंत्रकेँ मजबूत करबा लेल कयल जा रहल अछि।” ललन सिंह कहलनि जे चुनाव आयोगक एहि कदमसँ मात्र मतदाताक शुद्धता सुनिश्चित नहि होएत, बल्कि लोकतांत्रिक प्रक्रियामे पारदर्शिता आ विश्वास सेहो बढ़त। ओ कहलनि जे, सरकार आ निर्वाचन आयोगक उद्देश्य हरेक पात्र नागरिककेँ मतदानक अधिकार भेटय, मुदा अवैध तरीकासँ मतदाता सूचीमे शामिल लोकक खिलाफ कड़ा कार्यवाही जरूरी अछि।
बिहारमे मतदाता संशोधन पर बाजैत भाजपा नेता विवेक ठाकुर कहलनि जे विपक्ष द्वारा उठाओल गेल मुद्दामे कोनो दम नहि अछि। ओ कहलनि जे बिहार अपन निर्धारित लक्ष्यक लगभग 100 प्रतिशत पूरा कय लेलक अछि आ एहिमे जनताक पूर्ण भागीदारी रहल अछि। विवेक ठाकुर कहलनि जे, “एहि मुद्दामे कोनो सच्चाई नहि अछि। बिहार लगभग पूरा तरहें अपन लक्ष्यकेँ पूरा कय लेलक अछि। लोक एहिमे पूरा उत्साहसँ भाग लेलक अछि। आब विपक्ष एकरा मुद्दा बनेबाक कोशिशमे अछि, मुदा वास्तविकता इ अछि जे एहिमे कोनो मुद्दा बिल्कुल नहि अछि। कोनो व्यक्ति किछु कहि सकैत अछि, मुदा एकर कोनो आधार नहि अछि।”
