आगामी बिहार विधानसभा चुनावकेँ देखैत प्रवासी मिथिलावासीक गप्प बिहार सरकार धरि पहुँचाबय हेतु मैथिल पुनर्जागरण प्रकाशक नव प्रयोग, “चुनाव एक्सप्रेस”
*
मुंबई समदिया
*
अखबारक प्रबंध संपादक धर्मेंद्र कुमार झा केर नेतृत्वमे ‘चुनाव एक्सप्रेस’ मीरारोड पहुँचल। जतय कवि कोकिल बाबा विद्यापति चौक पर स्थानीय मैथिल सभक मध्य एकटा चुनावी परिचर्चाक आयोजन भेल। विद्यापति चौकक समीप मनपा उद्यानमे मैथिलक जुटान भेल, आ उपस्थित हर मैथिल आगामी विधानसभा चुनाव पर अप्पन-अप्पन मंतब्य रखलनि।
परिचर्चाक क्रममे, प्रो कृष्णा कुमार झा एनडीए केर बीस वर्षक शासन पर संतोष व्यक्त करैत कहलनि की, प्रदेशमे सरकार द्वारा कएल गेल विकास कार्य संतोषजनक रहल अछि। तहिना, अजित झा द्वारा असंतोष व्यक्त कएल गेल, शिक्षा, स्वास्थ्य संगहि पलायन केर ल’ क’ ओ, तमाम राजनीतिक दलकें कटघरामे ठाढ़ करबाक प्रयास कएलनि।
आई टी क्षेत्रमे कार्यरत पंकज पाठक वर्तमान जल संकट पर चिंता व्यक्त करैत, जल संरक्षण करबाक उपाय पर जोड़ दैत सरकारसँ, एहि क्षेत्रमे आर बेसी कार्य करबाक अपील कएलनि। एनडीए, आ इंडिया गठबंधन केर अतिरिक्त जन सुराज आ प्रशांत किशोर केर संबंधमे गप्प करैत, प्रभुकान्त मिश्र कहलनि की, पिके द्वारा उठाओल जा रहल विषय, महत्वपूर्ण त’ अछि, मुदा आगामी चुनावमे जन सूरज ओतेक प्रभावी नहि अछि।
तहिना, उद्यमी विनोद साह बिहारमे सड़क, बिजली आ उद्योगक क्षेत्रमे सरकारक प्रयासकेँ सराहना कएलनि। फ़िल्म निर्माता संतोष झा, डॉ राकेश झा, रामेश्वर झा आदि व्यक्तिक कहब छल जे प्रदेशक कानून व्यवस्था, विकासक मार्गमें, बाधक सिद्ध भ’ रहल अछि।
एहि परिचर्चामे प्रदेशक तमाम समस्या, जेना शिक्षा, स्वास्थ्य, रोजगार, पलायन, आ लचड़ कानून व्यवस्था पर खुलि क’ सभक विचार आयल। एहि परिचर्चामे बहुत रास मैथिल उपस्थित छलथि, अखबारक प्रबंध संपादक धर्मेंद्र झा, बेराबेरी सभसँ गप्प कएलनि। झा, कहलनि की चुनाव धरि ई चुनाव एक्सप्रेस एहिना चलैत रहत। अगिला पड़ाव मुम्बई महानगरक कोनो आन स्थान पर होयत, जतय विपुल संख्यामे मैथिल निवास करैत होय। अखबारक इएह प्रयास अछि की, प्रवासी लोकनिक स्वर सेहो सरकार धरि पहुंचय, किएक त’ प्रदेशक विकास आ तमाम नीति निर्णयसँ हुनको सभकेँ सरोकार छैन्ह। सभक इएह इच्छा अछि की, प्रदेशमे विकास होय, शिक्षा स्वास्थ्य आ रोजी रोजगारक क्षेत्रमे नीक कार्य होय जाहिसँ प्रदेशक आम जनमानस लाभान्वित भऽ सकैथ।
