काल्हि जेलसॅं इलाजक लेल पटनाक पारस अस्पताल आनल गेल एकटा कैदीक किछू शूटर गोली मारि हत्या कय देलक। आब एकर एकटा वीडियो सेहो सामने आयल अछि जाहिमे स्पष्ट देखल जा रहल अछि जे कोना ओ सब हत्या कयलक।
किछु समयमे बिहारमे विधानसभा चुनाव होबय जा रहल अछि आओर ओहिसॅं पहिने हर किछु दिन पर आपराधिक घटना घटि रहल अछि। लोकमे चिंता आ दहशत अछि। संगहि विपक्षी सरकारसॅं सवाल पूछि रहल अछि।
एहि क्रममे पटनामे काल्हि एकटा आओर चौंकाबय वला घटना घटल अछि। पटनाक पारस अस्पतालमे एकटा कैदीक हत्या कऽ देल गेल। एहि घटनाक एकटा वीडियो सेहो सामने आयल अछि, जाहिमे देखल जा रहल अछि जे शूटर सभ कोना कैदीकें मारलक।
पारस अस्पतालमे लगाओल गेल सीसीटीवी कैमरामे पूरा घटना कैद भऽ गेल अछि। देखल जा सकैत अछि जे कोना एक संग पांच शूटर अस्पतालक 209 नंबरक कमरामे प्रवेश करैत अछि। ओहि वीडियोमे देखल जाइत अछि जे सभ लग एक-एकटा पिस्तौल छल जे ओ सब ओहि रूममे घुसबासॅं पहिने निकालि लेलक आ एक-एक कय सब घुसि गेल। रूममे प्रवेश करैत देरी सब गोली चलाबय लगैत अछि आ कैदीकें मारि दैत अछि आ तुरंत बाद सब शूटर भागि जाइत अछि। ई पूरा घटना ओहि कैमरामे कैद भऽ गेल छल।
जनतब जे चंदन मिश्र नामक एकटा आरोपीकें इलाजक लेल पारस अस्पताल आनल गेल छल। चंदन मिश्र मूल रूपसॅं बक्सरक निवासी छल आ ओतय केसरी हत्याक मामिलामे नामित आरोपी छल। वर्तमानमे बेउर जेलमे बंद छल आ इलाजक लेल पैरोल पर पारस अस्पताल आनल गेल छल, जतय ओकर हत्या कऽ देल गेल।
