अंदरुनी कलह बढ़ल कर्नाटकक भाजपामे
येदियुरप्पा पर आलाकमानकेँ ब्लैकमेल करबाक आरोप
*
बेंगलुरु समदिया
*
कर्नाटकमे भाजपाक वरिष्ठ विधायक बसनागौड़ा पाटिल यतनालक पूर्व मुख्यमंत्री बी.एस. येदियुरप्पा पर अपन बेटाकेँ पद दिआबय केर आरोप अछि। विजयेन्द्रकेँ हुनका अध्यक्षक रूपमे स्थापित करबाक लेल आलाकमानकेँ ब्लैकमेल करबाक आरोप लगलाक बाद पार्टीमे अंदरूनी कलह बढ़ि गेल अछि। सोमदिन राति आरोप लगयलाक बाद विधायक कहलनि, “पता नहिं आलाकमान किएक डरि गेलाह। ओ अनुशासनक बात करैत छथि। की हम गुलाम छी? की हमरा लग शक्ति नहि अछि? हमरा लोकक समर्थन सेहो अछि। “येदियुरप्पा ई कहि केंद्रीय नेतासभकेँ ब्लैकमेल कयने छलाह जे ओ २०२५क लोकसभा चुनावक लेल प्रचार नहिं करताह। ओ आलाकमानकेँ कहलनि जे राज्यभरिमे नहिं घूमब आ अपनाकेँ शिवमोगा जिला धरि सीमित रखताह। विधायक इहो दावा कयलनि जे एहि सालक विधानसभा चुनावमे पूर्व मंत्री वी. सोमन्नाकेँ बलिक बकरा बनाओल गेल छल। “आश्चर्यजनक बात ई अछि जे विजयेन्द्र पूर्व मुख्यमंत्री बसवराज बोम्माईकेँ पराजित करबाक लेल पैसा पठौने छलाह। आब विजयेन्द्रकेँ भाजपाक प्रदेश अध्यक्ष बनाओल गेल अछि।
बोम्मई स्वयं विजयेन्द्र द्वारा अपन हारक लेल देल गेल धनराशिक बात साझा कयने छलाह। सच्चाई सामने आबय केर चाही जे बाप-बेटा द्वारा कोन षड्यंत्र रचल गेल छल। यतनाल ईहो कहलनि जे शिकारीपुरामे कांग्रेस विजयेन्द्रक विरुद्ध एकटा कमजोर उम्मीदवार उतारने छल। “ओ सभ (येदियुरप्पा आ विजयेन्द्र) पार्टी नेता सोमन्नाक खिलाफ मुख्यमंत्री सिद्धारमैयाकेँ समर्थन केलखिन। ओ उप मुख्यमंत्री डी.के. एंटनी सँ सेहो बात केलखिन। ओ शिवकुमार आ येदियुरप्पाक बीच एकटा गुप्त सौदाक आरोप सेहो लगओलनि। पार्टी आलाकमान एहि आरोपपर कोनो प्रतिक्रिया नहिं देलक अछि, जखन कि विजयेन्द्र कहलनि जे ओ टिप्पणी नहिं करताह।
