बिहारमे जारी मतदाता सूची संशोधनक खिलाफ बिहार बंदक असरि कतेको जिलामे देखल गेल। पटनाक अलावा गोपालगंज, दरभंगा, मधुबनी, आरा, किशनगंज, गयाजी, सहरसा सहित कतेको जिलामे बंद समर्थकक प्रदर्शन भेल।
बिहार बंदक दौरान बुधदिन पटनामे राहुल, तेजस्वी आ मुकेश सहनी सन प्रमुख नेता जमा भेलाह। आयकर गोलम्बरसँ चुनाव आयोग कार्यालय धरि मार्च निकालल गेल। शहीद स्मारकक लग पुलिसक बैरिकेड तोड़य केर कोशिश सेहो कएल गेल। राहुल गांधी मार्च आ भाषणक बाद दिल्ली वापस आबि गेलाह।
बंदकेँ सफल बनेबा लेल कम्युनिस्ट पार्टी (मार्क्सवादी-लेनिनवादी) केर मुक्ति महासचिव दिपांकर भट्टाचार्य आ अन्य विपक्षी दलक वरिष्ठ नेताक संग राहुल गांधी-तेजश्वी यादव सेहो मौजूद छलाह।
एहि दौरान किछु ठाम ट्रेन रोकल गेल तऽ किछु ठाम सड़क पर आगि लगा कए यातायात बाधित कयल गेल। महागठबंधनक घटक दल मतदाता सूचीक संशोधनक खिलाफ एही बंदक आह्वान कयने छल।
दरअसल पूर्व निर्धारित कार्यक्रमक अनुसार लोकसभामे विपक्षक नेता राहुल गांधी एहि बिहार बंदमे गति देबा लेल हवाई जहाजसँ पटना पहुंचलाह। पटना पहुँचलाक बाद राहुल गांधी आयकर गोलंबर पर पहुँचलाह। बिहार विधानसभामे विपक्षक नेता तेजस्वी यादव आयकर गोलंबर पर पहिनेसँ मौजूद छलाह। एहि ठाम इंडी एलायंसक कार्यकर्ताक भारी भीड़ जमा भऽ गेल छल। एकर बाद तेजस्वी यादव, राहुल गांधी, दीपांकर भट्टाचार्य आ मुकेश सहनी सन पैघ नेता गाड़ीमे चढ़िकेँ मार्च लेल निकलि गेलाह।
गाड़ीमे सवार वरिष्ठ नेताक संग कार्यकर्ता पटनाक सड़क पर लगातार पैदल मार्च कऽ रहल छल। पैदल मार्च करैत ई भीड़ शहीद स्मारक पर पहुँचल। पुलिस एहि ठामक चुनाव कार्यालयसँ किछुए दूरी पर बैरिकेड लगा देने छल। बहुतो कार्यकर्ता एहि ठामक बैरिकेड तोड़बाक प्रयास कयलनि आ स्थिति तनावपूर्ण भऽ गेल। पुलिस लगातार अपील कय रहल छल जे एहि ठाम बैरिकेड नहि तोड़ल जाए। एहि दौरान महागठबंधनक नेता अपन भाषणमे केंद्र आ राज्य सरकारकेँ घेरलनि आ बिहार चुनावसँ पहिने मतदाता संशोधनकेँ घातक बतेलनि।
