पूर्णियाक निर्माणाधीन हवाई अड्डा जल्दिये शुरू करय लेल बृहस्पतिदिन एकटा महत्वपूर्ण बैसार भेल। एहि उच्च स्तरीय समीक्षा बैसारमे बिहार सरकारक मुख्य सचिव अमृत लाल मीना, एयरपोर्ट अथॉरिटी ऑफ इंडियाक अध्यक्ष बिपिन कुमार, आओर अन्य वरिष्ठ अधिकारी शामिल छलाह। बैसारमे पूर्णिया हवाई अड्डाक निर्माण कार्यक विस्तारसँ समीक्षा कयल गेल।
मुख्य सचिव अंतरिम टर्मिनल भवन, एप्रोन, रनवे, एप्रोच पथ सहित सबटा प्रमुख भागक अद्यतन स्थितिक जानकारी लेलथि। ओ संबंधित अभियंता आ ठेकेदार केर निर्धारित समय सीमामे काज केर गुणवत्ताक संग पूरा करबाक निर्देश देलथि, ताकि हवाई अड्डा जल्दीसँ जल्दी शुरू भs सकए।
मुख्य सचिव संबंधित कार्यकारी अभियंता केर हवाई अड्डा तक जाए वाला सभ सड़कक निर्माण आ मरम्मतक काजमे तेजी अनबाक निर्देश सेहो देलथि। ओ कहला जे यात्रीक सुविधा लेल सड़कक नीक सुविधा बहुत जरूरी अछि आ एहिसँ हवाई अड्डाक संचालनमे सेहो सुविधा होएत। बैसारक दौरान हवाई अड्डा प्राधिकरण आ अन्य अधिकारी आश्वासन देलनि कि निर्माण कार्यकेँ जल्दीसँ जल्दी पूरा करय केर हर संभव प्रयास कयल जा रहल अछि।
एहि समीक्षा बैसारमे मुख्यमंत्री सचिवालय केर अपर मुख्य सचिव एस सिद्धार्थ, शहरी एवं उड्डयन निदेशक डॉ. नीलेश रामचंद्र देवड़े, पूर्णियाक प्रमंडल आयुक्त राजेश कुमार, डीआईजी प्रमोद कुमार मंडल, जिलाधिकारी अंशुल कुमार, एसपी स्वीटी सहरावत सहित कतेको वरिष्ठ अधिकारी उपस्थित छलथि | विशेषज्ञ केर मानब अछि कि पूर्णिया हवाई अड्डा खुललासँ नहिं मात्र क्षेत्रक लोककेँ हवाई सेवा भेटत, बल्कि स्थानीय व्यवसाय, व्यापार आ पर्यटन केर सेहो बढ़ावा भेटत । एहि क्षेत्रक उत्पादकेँ देशक अन्य भागमे पठेबामे आसानी होयत, जाहिसँ आर्थिक विकासक गति केर नव बल भेटत।
