दरभंगा-मुजफ्फरपुर एनएच27 पर मंगलदिन भोरमे जिला परिवहन पदाधिकारी कार्यालय केर बोलेरो गाड़ीमे तेज रफ्तार ट्रक ठोकर मारलक। दुर्घटनामे डीटीओ कार्यालयक ईएसआई मुन्ना कुमार (प्रवर्तन अवर निरीक्षक) केँ मौका पर मृत्यु भs गेल। चालक आ अन्य कर्मी गंभीर रूपसँ घायल भs गेल।
ठोकर एतेक जोरदार छल जे बोलेरो पलटि कए 30 फीट गहींर खाईधमे चलि गेल। घायल दुनू कर्मीकेँ डीएमसीएचमे भर्ती कराओल गेल अछि। मृतक मुन्ना कुमार समस्तीपुर जिलाक हसनपुर थाना क्षेत्रक खोरी गामक निवासी छलथि। जखन कि घायल अजय कुमार आ रवि कुमारक हालत गंभीर बताओल जा रहल अछि।
मृतकक परिवारक सदस्यकेँ घटनाक जानकारी देल गेल अछि। बताओल जा रहल अछि जे दरभंगा डीटीओक गाड़ी एनएच 27 पर मब्बी थाना क्षेत्रक रिलायंस पेट्रोल पंप लग गाड़ीक जांच कs रहल छल, एहि दौरान एकटा तेज रफ्तार वाहन डीटीओक गाड़ीसँ टकरा गेल, जाहिसँ डीटीओक गाड़ी सड़कसँ करीब 30 फीट दूर खाईधमे पलटि गेल। जकर कारण मुन्ना कुमार केर मौका पर मृत्यु भs गेल जखनि कि दू टा आओर कर्मी गंभीर रूपसँ घायल भs गेल।
मुदा ठोकर मारय वाला गाड़ीक बारेमे जानकारी समाचार लिखय धरि नहि भेटल छल। एहि पूरा मामिला पर दरभंगाक मोटर वाहन निरीक्षक सतीश कुमार कहला जे जहिना हमरा सबकेँ एहि घटनाक जानकारी भेटल तs हम सब मौका पर पहुँचलौंह। मृतक मुन्ना कुमार समस्तीपुर जिलाक हसनपुर निवासी छलथि। ओ कहलनि जे, लग पासमे लागल सीसीटीवी फुटेज केर स्कैन कs ठोकर मारय वाला गाड़ीकेँ पकड़ल जा सकैत अछि।
