बिहार सरकारक कला एवं संस्कृति विभागक तत्वाधानमे प्रखंड क्षेत्रक तरौनी गाममे जन कवि बाबा नागार्जुन पुस्तकालय परिसरमे जनकवि बैद्यनाथ मिश्र यात्रीक जयंती सोमदिन समारोहपूर्वक भव्यताक संग मनाओल जायत । एकर तैयारी सरकारी आ निजी स्तर पर जोर शोरसँ कयल जा रहल अछि।
अनुमंडल पदाधिकारी मनीष कुमार झा तरौनी गाम अवस्थित जनकवि बाबा नागार्जुन पुस्तकालय पर पहुँचि कय तैयारीक विस्तृत जायजा लेलन्हि आ कार्यक्रमक विस्तृत रूपरेखा तय कयल गेल । कार्यक्रमक नोडल पदाधिकारी सह प्रखंड विकास पदाधिकारी प्रवीण कुमारकेँ आवश्यक दिशा निर्देश देल गेल।
एहि दौरान एस डी ओ झा बतेलनि जे एहि अवसर पर बाबाक स्मृतिमे अनेको कार्यक्रम आयोजित कयल जायत । कार्यक्रमक प्रारम्भ बाबाक स्मारक पर माल्यार्पणसँ होयत । तकरा बाद बाबाक व्यक्तित्व आ कृतित्व पर परिचर्चाक आयोजन कयल जाएत । एहि केर संगहि रातिमे कला संस्कृति विभाग द्वारा भव्य सांस्कृतिक कार्यक्रम आ विराट कवि सम्मेलनक आयोजन कयल जायत ।
ज्ञातव्य अछि जे जनकवि बाबा नागार्जुनक जयंती समारोहकेंँ स्थानीय विधायक प्रो० विनय कुमार चौधरीक प्रयासे साल 2023 मे सरकार द्वारा राजकीय समारोहक दर्जा दऽ कऽ भव्य रूपसँ मनेबाक शुरुआत कयल गेल छल । एहि लेल अनुमंडल पदाधिकारी मनीष कुमार झा केर नेतृत्वमे प्रखंड विकास पदाधिकारी प्रवीण कुमार आ अंचल अधिकारी अश्विनी कुमार अपन नाजिर श्याम कुमार मिश्र आ अन्यान्य कर्मी सबहक संग पछिला तीन दिनस जुटल छथि।
