बिहार सरकारक नगर विकास आ आवास मंत्री जीवेश कुमार नेता प्रतिपक्ष तेजस्वी यादव पर कड़गर हमला कयलनि। ओ कहलनि जे, मुख्यमंत्री नीतीश कुमार द्वारा सामाजिक सुरक्षा पेंशनक राशि बढ़ेलासँ राजदक नेता खास कs तेजस्वी यादवक बेचैनी बढ़ि गेल अछि।
मंत्री जीवेश कुमार कहला जे मुख्यमंत्री नीतीश कुमार गरीब आ जरूरतमंदक आवाज सुनलथि आ सामाजिक सुरक्षा पेंशनकेँ 400 टकासँ बढ़ा कs 1100 टका कs देलनि अछि। ई फैसला राज्यक लाखों बुजुर्ग, विधवा आ दिव्यांग नागरिक लेल पैघ राहत अछि। मुदा जखनि कखनो सरकार गरीबक हितमे कोनो काज करैत अछि तs तेजस्वी यादव आ हुनकर परिवार छाती पीटय लगैत छथि।
ओ आगू कहलनि जे, पेंशनक राशि बढ़ाबय हेतु लोकक नमहर समयसँ मांग छल, जखनि कखनो हम सब जनताक बीच जाइत छलहुं तs लोक कहैत छल 400 रुपयाक पेंशनसँ गुजर नहि भs सकैत अछि। एकरा बढ़ा कs कमसँ कम 1000 कs देल जाए। मुख्यमंत्री जनभावना केर सम्मान करैत एकरा बढ़ा कs 1100 रुपैया कs देलखिन्ह। एहिसँ राज्य भरिमे खुशीक लहर आबि गेल अछि।
तेजस्वी यादवक निशाना बना कs मंत्री कहला जे तेजस्वी यादव लग चुनावमे कहबाक लेल किछु नहि अछि। ओ अपन माता-पिताक 15 सालक शासनकेँ हवाला नहि कहि सकैत छथि, कारण जनता एखनो ओहि कालखंडकेँ जंगलराजक नामसँ याद करैत अछि। तेँ आब ओ मात्र बयानबाजी कऽ जनताकेँ गुमराह करबाक प्रयास कऽ रहल छथि ।
मंत्री जीवेश कुमार विश्वास जतौलनि जे आगामी विधानसभा चुनावमे जनता एक बेर फेर नीतीश कुमारक नेतृत्वमे एनडीए सरकारकेँ सत्तामे आनय जा रहल अछि। ओ कहला जे बिहारक जनता केर पता अछि जे केकर कार्यकालमे विकास भेल अछि आ वास्तवमे गरीबक के भला कयलक अछि।
