महिलाक एक्कहि जाति अछि, मुदा विपक्ष कय रहल बांटय केर प्रयास – मोदी

महिलाक एक्कहि जाति अछि, मुदा विपक्ष कय रहल बांटय केर प्रयास – मोदी
*
नई दिल्ली
*
प्रधानमंत्री नरेन्द्र मोदी शनिदिन वीडियो कॉन्फ्रेंसिंग के माध्यमसँ भारत संकल्प यात्राक लाभार्थीसँ बातचीत केलखिन। एतय लाभार्थी सभकेँ सम्बोधित करैत मोदी कहलनि जे ‘मोदीक गारंटी’ वाला वाहनकेँ लऽ कऽ प्रत्येक गाममे उत्साह अछि, देशक कोन-कोनमे लोक एकरा लऽ कऽ गप्प कऽ रहल अछि। ओ आगू कहलनि, “हम किछु लाभार्थीसँ बातचीत केलहुं। हमर कोनो ने कोनो योजनासँ देशभरिक करोड़ो परिवार लाभान्वित भेल अछि। एकर बाद पीएम मोदी पाँच राज्यमे हालहिमे भेल विधानसभा चुनावक परिणामक उल्लेख करैत देशक पैघ जनसंख्याक अभावक समस्या आ कष्टक लेल विपक्षी दलसभकेँ दोषी ठहरौलनि आ विपक्षी दलसभ पर देशक महिलासभकेँ जातिक आधारपर विभाजित करबाक प्रयास करबाक आरोप लगओलनि।

वीडियो कॉन्फ्रेंसिंगक माध्यमसँ विकास भारत संकल्प यात्राक लाभार्थीक संग बातचीत करैत प्रधानमंत्री विपक्षी दल पर महिलाकेँ जातिक आधार पर विभाजित करय केर आरोप लगाबैत कहलैथ जे सभ महिलाकेँ एक रहबाक अछि।
आइ-काल्हि लोक हमर महिलासभक बीच सेहो दरार उत्पन्न कऽ रहल अछि, ओकरा विभाजित करबाक प्रयास कऽ रहल अछि। ई सही नहिं अछि। सभ महिला एक अछि आ महिला एक जातिक अछि।

प्रधानमंत्री आगू कहलनि जे यदि विपक्षी दल राजनीतिक स्वार्थक बदला सेवाक भावनाकेँ सर्वोपरि रखैत, यदि सेवाकेँ अपन काज मानैत तऽ देशक एकटा पैघ आबादी अभाव, परेशानी, कष्टमे नहिं रहैत। ओ कहलनि जे देशमे हालहिमे भेल विधानसभा चुनावक परिणामक चर्चा आइयो खूब भऽ रहल अछि। एहि चुनाव परिणामसँ ई स्पष्ट भऽ गेल अछि जे मोदीक गारंटीमे योग्यता अछि। लोक विपक्षी दलक झूठ वादा पर भरोसा नहिं करैत छथि। ओ सभ मतदाताक प्रति आभारी छथि जे मोदीक गारंटीपर भरोसा कयलनि।

पीएम मोदी आगू कहलनि जे देश भरिक गामक करोड़ो परिवारकेँ हुनक सरकारक कोनो न कोनो योजनाक निश्चित लाभ भेटल अछि। जखन ई लाभ भेटैत अछि तखन एकटा विश्वास बढ़ि जाइत अछि। जीवन जीबए केर एकटा नव शक्ति भेटैत अछि। भीख मांगबाक जे स्थिति पहिने छल, आब चलि गेल। सरकार लाभार्थीक पहिचान कयलक आ फेर हुनका सभकेँ एकर लाभ देबाक लेल कदम उठौलक। ताहि लेल आइ लोक कहैत छथि – मोदीक गारंटीक अर्थ अछि पूर्तिक गारंटी।
प्रधानमंत्री आगू कहलखिन, “हमरा लेल देशक हर गरीब हमरा लेल वीआईपी अछि, देशक हर माँ-बहिन-बेटी हमरा लेल वीआईपी अछि, देशक हर किसान हमरा लेल वीआईपी अछि, देशक हर युवा हमरा लेल वीआईपी अछि। नव लाभार्थी उज्ज्वला योजनाक अन्तर्गत मुफ्त गैस कनेक्शनक लेल आवेदन कयलनि अछि। एहि यात्राक दौरान मौका पर ३५ लाखसँ बेसी आयुष्मान कार्ड सेहो देल गेल अछि। “