बिहारक पूर्णिया जिलाक महिला सभक लेल ई एकटा नव पहलक योजना कयल जा रहल अछि, धीरे-धीरे आन जिला सभमे सेहो ई कयल जाएत। महिलाक सुरक्षा आ मददिक लेल एकटा सराहनीय पहल भs रहल अछि. एहि ठाम हिंसासँ प्रभावित महिलाक लेल एक स्टॉप सेंटरक निर्माण शुरू भs गेल अछि।
जिलाधिकारी अंशुल कुमार भूमि पूजनक संग भवन केर निर्माण कार्य शुरू कयलनि।
ई केंद्र ओहि महिला सभक लेल बनाओल जा रहल अछि जे कोनो तरहक घरेलू, मानसिक वा सामाजिक हिंसाक शिकार भेल छथि । एहि केंद्रमे पीड़ित महिला केर कानूनी सहायता, चिकित्सा सुविधा आ परामर्श जेहन सबटा आवश्यक सेवा एक ठाम उपलब्ध कराओल जाएत। एकर विशेषता ई अछि कि, महिला केर जाति, धर्म, वैवाहिक स्थिति वा शैक्षणिक स्तरक बिना देखने सबकेँ सामान सहायता देल जायत।
शुरूमे ई केंद्र अम्बेडकर छात्रावास लग खेलक मैदानमे बनय वाला छल, मुदा, छात्रावासक छात्र सब आपत्ति जतौलनि आ जिलाधिकारी तत्काल निर्णय लेलनि आ अनुमंडल अधिकारीकेँ छात्र सबसँ बात करय लेल कहलनि, छात्र सबकेँ बात सुनलाक बाद आ हुनकर विचार बुझलाक बाद प्रशासन सेंटरकेँ समाहरणालय परिसरमे शिफ्ट करयकेँ फैसला कयलक।
एहि केर अंतर्गत – :
• पीड़ित महिलाकेँ अलग-अलग कार्यालयमे भटकय नहि परत,
. सरकारी योजना, कानून आ सहायता सेवा तक सीधा पहुंच होयत,
. संकटक समय महिलाकेँ तुरंत मददि आ सुरक्षित माहौल उपलब्ध कराओल जायत,
. कानूनी सहायता, स्वास्थ्य सेवा आ मानसिक परामर्श – सबटा एक ठाम उपलब्ध होयत।
