जिला विधिक सेवा प्राधिकारक दिसिसँ गरीब, असहाय, अनाथ बच्चा सबहक आधार कार्ड बनेबाक हेतु “साथी” नामक अभियानक शुरुआत कयल गेल अछि ।
एहि अभियानक तहत प्राधिकारक सचिव आरती कुमारी ग्राम करहरी वार्ड नं 25 राम टोलक दौरा कऽ बच्चा आ ओकर परिजनसँ मुलाकात कयलनि। ओ बतेलनि जे नालसा द्वारा संविधानक अनुरूप समान न्याय केर बढ़ावा देबाक लेल देशव्यापी अभियान “साथी” लांच कयल गेल अछि जकर उद्देश्य असहाय बच्चा सभकेँ कानूनी पहिचान प्रदान करैत सामाजिक कल्याण सेवा धरि ओकर पहुंच सुनिश्चित केनाई अछि ।
सचिव आरती कुमारी कहलनि जे बच्चा सबहक लेल उपलब्ध सभ सरकारी लाभ , शिक्षा , स्वास्थ्य सेवा आदि केर लेल आधार कार्ड एगो महत्वपूर्ण माध्यम अछि । एकरा बगैर बच्चा सभ कल्याणकारी योजना सबहक लाभसँ वंचित रहि जाइत अछि । ओ बतेलनि जे 26 जून धरि आधार कार्ड रहित अनाथ आ असहाय बच्चा सबहक सर्वेक्षण आ पहचान कयल जायत आ 5 अगस्त धरि शिविरक आयोजन कय आधार कार्ड लेल पंजीकरण कयल जायत । एहि केर लेल जिला साथी समितिक गठन कयल गेल अछि जे प्रखंड स्तर पर सर्वेक्षण आ पहिचानक काज कऽ रहल छथि। जिनका आधार कार्ड नहि छन्हि , एहेन जरुरतमंद लोक सीधा जिला विधिक सेवा प्राधिकार कार्यालयसँ सेहो संपर्क कऽ सकैत छथि।
मौका पर सहायक कुमार गौरव, कमलेश, पीएलवी मो. महफूज आलम, नितीश कुमार राम आदि मौजूद छलथि।
