ई घटना मंगलकेँ भोरे सौरबाजार सोनवर्षा राज मुख्य सड़क पर भेल। घटनाक बाद मृतकक परिजन आ स्थानीय लोक सड़क जाम कs देलक। जाहि कारण यातायात पूर्णतः बाधित भs गेल। मृतकक परिजन जाहि वाहनसँ दुर्घटना भेल ओकर चालककेँ पकड़ि ओकरा पर कारवाई कs उचित मुआवजा देबाक मांग कऽ रहल छलथि।
जानकारीक अनुसार सौरबाजार थाना क्षेत्रक सुहथ गाम निवासी 60 वर्षीय भरत राम आ हुनकर पत्नी 55 वर्षीय श्यामा देवी मंगलदिन भोरे उठलाक बाद सौरबाजार सोनवर्षा राज मुख्य सड़क पर अपन दलानक सामने सड़क पर टहलैत छलाह। तखने सोनवर्षा राज दिसिसँ आबि रहल एकटा तेज गतिक अनियंत्रित अनजान वाहन दुनू गोटेकेँ पीचि देलक। श्यामा देवीके शव हुनकर दरबजाक सामने सड़कक कातमे पड़ल छल, जखनि कि भरत रामक शव गायब छल। हुनकर कोनो निशान तत्काल नहि भेटल छल।
खोजबीनक दौरान सौरबाजार प्रखंड मुख्यालयक समीप बैंक ऑफ इंडिया शाखाक सामने फेंकल भरत रामक किछु कपड़ा भेटल, जखनि कि अजगैवा गामक आगू सड़क पर शवक किछु अंग पड़ल भेटल। जाहि कारणेँ आशंका अछि जे हुनका ठोकर मारय बला ड्राइवर हुनकर शवकेँ घसीटैत अपना संग लऽ गेल ।
घटनाक बाद आक्रोशित परिवारक सदस्य आ ग्रामीण मुख्य सड़ककेँ जाम कs मृतक बुजुर्गक शव बरामद कs दोषी चालककेँ गिरफ्तार कs उचित कानूनी कारवाई आ मुआवजा लेबाक मांग कs रहल छलथि।
जामक कारण सड़कक दुनु कात गाड़ीक लंबा कतार लागल छल, जाहि कारण पैदल चलनिहार आ वाहन ड्राइवरकेँ बहुत परेशानीक सामना करय पड़ल, घटनाक जानकारी भेटला पर सौरबाजार थाना प्रमुख अजय कुमार पासवान अपन टीमक संग मौका पर पहुँचलाह आ जाम हटेबाक कोशिशमे छलाह, मुदा आक्रोशित लोक शवकेँ बरामद करयसँ पहिने जाम हटाबयसँ साफ मना कs देलनि, जकर बाद वरिष्ठ अधिकारीकेँ घटनाक जानकारी देल गेल।
