विधानसभा चुनावसँ पहिने राजनीतिक घमासान तेज भऽ गेल अछि। मुख्यमंत्री नीतीश कुमार सरकारक उपलब्धि गिना रहल छथि। जखनिकि, राजद 20 वर्षक कार्यकालक हिसाब माँगि रहल अछि।
चुनावी वर्षमें राजद एनडीए सरकार पर हमलावर अछि। निशाना पर प्रधानमंत्री मोदी संग मुख्यमंत्री नीतीश कुमार सेहो छथि। पलायन, कानूनी व्यवस्था, बेरोजगारी आ स्वास्थ्यक खराबी पर राजद आक्रामक अछि। एक्स पर पोस्ट शेयर कय राजद डबल इंजनक सरकारसँ 20 वर्षक हिसाब मांगलक। पोस्टमे लिखल गेल, ‘बिहारकेँ डबल इंजनक खटारा सरकारसँ की भेटल ?’ राजद खटारा कारमे पीएम मोदी संग मुख्यमंत्री नीतीश कुमारक तस्वीर शेयर करैत एनडीए सरकार पर तंज कएलक। पोस्टमे लिखल गेल, ‘बिहार आब ठगायल नहिं जायत। जनता पुछत सवाल, देबय पड़त जवाब।’
राजद तंज करैत कहलक जे जर्जर गाड़ी आब नहि चलि सकैत अछि। बिहारमे एहि साल विधानसभा चुनाव प्रस्तावित अछि। मुख्यमंत्री नीतीश कुमार एनडीए सरकारक काजकेँ शानदार बता रहल छथि। सार्वजनिक मंच पर पूर्ववर्ती सरकार पर विकास विरोधी होयबाक आरोप सेहो मढ़ि रहल छथि। सत्ता पक्ष आ विपक्षक दिसिसँ वार पलटवारक सिलसिला जारी अछि। बीजेपी सेहो लालू राबड़ी शासन कालमे अपराधक मुद्दा उठा कय जनतासँ समर्थन मांगि रहल अछि। बिहारमे सीधी लड़ाई एनडीए आ महागठबंधनक बीच अछि। महागठबंधनक दिसिसँ सरकार पर निशाना साधबाक कमान तेजस्वी यादव सम्हारि लेने छथि। तेजस्वी यादव सेहो सोशल मीडिया पर लगातार पोस्ट कय रहल छथि। राजद सोशल मीडियाकेँ बिहारक ज्वलंत समस्या उठाबैक प्रमुख माध्यम बना लेने अछि। कखनो वीडियो, कखनो पोस्टर-बैनर आ कखनो कार्टूनक जरिए निशाना साधल जा रहल अछि।
राजदक ताजा पोस्टमे पलायन, कानून व्यवस्था, बेरोजगारी, स्वास्थ्य-शिक्षाक बदहाली, भ्रष्टाचार आ पुलिसिया अत्याचार केर प्रमुख मुद्दा बनाओल गेल अछि।
