बिहारक पूर्व मुख्यमंत्री आ राष्ट्रीय जनता दल (राजद) प्रमुख लालू प्रसाद यादवक बड़ाका बेटा तेज प्रताप यादवकेँ पार्टी आ घरसँ निकालय पर ऐश्वर्या राय पहिल बेर मीडियाक सामने अएलीह। ऐश्वर्या सोमदिन प्रेस कॉन्फ्रेंस करैत कहलनि, ‘हम ई पुछय चाहैत छी जे जखनि एहि लोक (लालू यादवक परिवार) सभकेँ तेजप्रतापक बारेमे पता छल जे एहेन बात अछि तँ हमर विवाह किया कराओल गेल, हमर जिन्दगी किया बर्बाद कएलनि ? हुनकासँ पुछू जे हमरा मारलक कियाक ? आब हिनकर सामाजिक न्याय केम्हर गेल ? ई सब मिलल अछि, कियो अलग नहि भेल अछि। काल्हियो राबड़ी देवी तेजप्रतापक नोर पोछै लेल हुनका पास गेल होयत, कहल गेल होयत जे एखनि शान्त रहय, हम सब ठिक कय देब। चुनाव नजदीक छैक, तेँ ओ एहेन कदम उठेलनि आ ई ड्रामा रचल गेल अछि।
ऐश्वर्या राय कहलनि कि हमरा तलाकक मामिलाक जनतब मीडियासँ भेटल। जे किछु जानकारी भेटल से सब मीडियाक माध्यमसँ भेटल। हम नहि जनैत रही कि की भऽ रहल अछि। हुनकासँ पूछू, हमर जीवन बर्बाद करय केर की जरूरत रहल ? जखनि हमरा मारल गेल, तखनि हुनक सामाजिक न्याय कतय छल ? हुनकासँ पूछू, हमर की होएत ?
ऐश्वर्या कहलनि कि ओ सभ हर चीजक दोष हमरा पर मढ़ैत अछि। आब जखनि ई बात सामने आयल अछि जे हुनकर 12 वर्षसँ अफेयर चलि रहल अछि, की लालू यादव, राबड़ी आ तेजस्वी यादवकेँ ई पता नहिं होयत ? अपन बेटाक गलतीक इल्जाम छुपाबय लेल लड़की पर दोष लगा दैत छथि। सब मिलल अछि, हमरा कखन न्याय मिलत ? हम अपन लड़ाई जारी रखब।
दोसर दिसि, राजद प्रमुख लालू प्रसाद यादव द्वारा तेजप्रताप यादवकेँ पार्टीसँ निष्कासन पर मीसा भारती कहलनि, “हमर दल केर राष्ट्रीय अध्यक्ष आ हमर परिवारक मुखिया हमर पिता लालू प्रसाद यादव अपन स्टैंड क्लियर कऽ देलनि। एकर अलावा आओर हमरा किछु नहिं कहय केर अछि।
