मधुबनीमे निगरानी टीम एकटा पैघ कारवाई कयलक अछि। टीम जयनगर अंचलक अंचल निरीक्षक अजय कुमार मंडलकेँ तीन लाख रुपया घूस लैत रंगल हाथ गिरफ्तार कयलक अछि।
आरोप अछि जे अजय कुमार मंडल दाखिल-खारिजक लेल 20 लाख रुपया घूस मांगने छलाह। पीड़िता एहि बातक शिकायत निगरानी जांच ब्यूरोमे कयने छल। एहि शिकायतक आधार पर इ कारवाई कयल गेल। एतय अंचल निरीक्षकक गिरफ्तारीक बाद इलाकामे हड़कंप मचि गेल। निगरानी टीम अजय कुमार मंडलक संग पटना लेल रवाना भेल।
बताओल जा रहल अछि जे अजय कुमार मंडल कोनो जमीनक दाखिल-खारिजक मामिलामे 20 लाख टका घूस मांगने छलाह। पीड़िता एकरा बेरमे पूरा राशि देबयसँ मना कs देलक। एकर बाद पीड़िताकेँ किस्तमे घूस देबय लेल कहल गेल, पीड़िता एहि बातक शिकायत निगरानीमे केलक। निगरानी टीम पहिने शिकायतक जांच कयलक। बात सत्य पाओल गेल। एकर बाद डीएसपी सुजीत कुमारक नेतृत्वमे एकटा विशेष टीमक गठन कयल गेल।
शनिकेँ निगरानीक अलग-अलग टीम जयनगर अंचल कार्यालय आ अंचल निरीक्षकक आवास पर पहुंचल। एकर बाद पीड़िताकेँ पहिल किस्तक राशि लs कs आबय लेल कहल गेल। सतर्कता टीम आरोपीकेँ पकड़य लेल जाल बिछा देलक। एकर बाद पीड़िता जहिना घूसक नाम पर आरोपीकेँ तीन लाखक राशि देलक तs निगरानी अधिकारी ओकरा मौका पर पकड़ि लेलक। गिरफ्तारीक बाद अजय मंडलके आगूक पूछताछक लेल पटना आनल गेल।
एहि मामिलामे डीएसपी सुजीत कुमार कहला जे अजय कुमार मंडलक खिलाफ आवेदन भेटल, जाहिमे घूस मांगबाक जानकारी देल गेल। जांचक दौरान ईहो सामने आयल अछि जे वरिष्ठ अधिकारीक एहिमे शामिल हेबाक संभावना अछि, जकर गहन जांच भs रहल अछि।
एहि कारवाई केर बाद जिलाक प्रशासनिक हलकामे दहशत मचल अछि, खास कऽ अंचल कार्यालयमे कार्यरत अधिकारी आ कर्मचारीमे दहशतक माहौल अछि। ई मामिला ई उजागर करैत अछि कि जमीनसँ जुड़ल छोट-छोट मामिलामे आम लोकसँ कोना अवैध वसूली कयल जाइत अछि।
