बिहारक नेता प्रतिपक्ष तेजस्वी यादव शुक्रकेँ जिलामे आयोजित प्रेस कॉन्फ्रेंसमे राष्ट्रीय सुरक्षाक मुद्दा उठबैत केंद्र सरकार पर सवाल उठेलनि। तेजस्वी यादव कहलनि जे वर्तमान समयमे भारत पाकिस्तानकेँ कड़ा जवाब दऽ रहल अछि। विपक्ष पूर्णरूपेण सरकार आ देशक संग ठाढ़ अछि। मुदा राष्ट्रीय सुरक्षा एहेन संवेदनशील मुद्दा पर राजनीति नहि होयबाक चाही। सभ राजनीतिक दलकेँ एकजुट भऽ कऽ देशहितमे काज करबाक चाही। हमर सेना आ अर्धसैनिक बल देशक रक्षामे दिन-राति लागल अछि। एहेनमे हमर कर्तव्य अछि जे हम हुनकर संग मजबूतीसँ ठाढ़ रही।
प्रेस वार्ताक दौरान तेजस्वी यादव बौसी थाना क्षेत्रक हालिया दुखद घटना पर सेहो गहन संवेदनशीलता व्यक्त कएलनि। ओ कहलनि जे ओ ओहि युवकक परिजनसँ भेंट करय लेल आएल छथि, जकर मृत्यु बारात लए जाय समय बसक ऊपरसँ गुजरैत हाई वोल्टेज तारक चपेटमे अयलासँ भेल। ओ सरकारसँ एहेन घटनाक रोकथामक लेल आवश्यक डेग उठयबाक माँग करैत कहलनि जे सरकारकेँ तुरन्त बिजलीक तारक व्यवस्था आ सुरक्षा मानककेँ सुनिश्चित करबाक चाही।
तेजस्वी यादव सेना आ अर्धसैनिक बलक जवान सभकेँ लेल कहलनि जे लडाईक दौरान शहीद भेल अर्धसैनिक बलक जवान सभकेँ सेहो शहीदक दर्जा भेटबाक चाही। एहि विषयमे ओ केंद्र सरकारकेँ पत्र सेहो लिखलनि अछि। देशक सुरक्षामे लागल हर जवानक सम्मान समान रूपसँ होएब आवश्यक अछि। ई हमर नैतिक जिम्मेदारी अछि। पहलगाम हमला पर तेजस्वी यादव कहलनि जे देश जानय चाहैत अछि जे आखिर ई घटना कोना भेल आ कतेक पैघ नुकसान भेल। विपक्ष एहि मुद्दा पर निरंतर प्रश्न उठबैत रहल अछि, मुदा सरकार एखनि धरि स्पष्ट उत्तर नहि देलक।
बिहारक समस्यासभ पर तेजस्वी यादव बेरोजगारी आ पलायनकेँ सभसँ पैघ चुनौती कहलनि। ओ कहलनि कि बिहारमे फैक्ट्री आ निवेशक कमीक कारण युवा लोकनिकेँ रोजगारक लेल अन्य राज्य दिसि जाय पड़ैत अछि। शिक्षा आ स्वास्थ्य सेवासभक बदहालीक कारण लोक बाहर जाइत अछि। बितल 20 वर्षसँ बिहारमे एक्के व्यक्ति मुख्यमंत्री छथि आ केन्द्रमे भाजपाकेँ 11 वर्ष भऽ गेल अछि, मुदा बिहारमे कोनो ठोस विकास नहि भेल अछि। आब जनता जागरूक भऽ चुकल छथि आ बदलाव चाहैत छथि।
