जेडीयूक पूर्व राष्ट्रीय अध्यक्ष आरसीपी सिंह रविकें प्रशांत किशोरक पार्टीक दामन थामि लेलनि। ओ अपन पार्टी ASA केँ सेहो जन सुराजमे विलय कए देलन्हि।
करीब सात महिना पहिने ओ ‘आप सबकी आवाज’ (ASA) नामसँ अपन पार्टीक शुरुआत कएलन्हि। आब ओ अपन पार्टीकेँ जन सुराजमे विलय कए देलन्हि।
आरसीपी सिंह भारतीय प्रशासनिक सेवाकेँ अधिकारी रहल छथि। मुख्यमंत्री नीतीश कुमारक प्रधान सचिवक रूपमे सेहो ओ नमहर समय तक काज कएलन्हि। यद्यपि नीतीश कुमारसँ मतभेद भेलाक बाद ओ बीजेपीक दामन थामि लेने छलथि आ तदुपरांत भाजपा द्वारा दरकिनार कएल जाएबाक बाद ओ अपन पार्टी बनेबाक घोषणा कएने छलथि।
रामचंद्र प्रसाद सिंहक जन्म 6 जुलाई 1958 केँ बिहारक नालंदा जिलाक मुस्तफापुरमे भेल। ओ अन्य पिछड़ा वर्ग (OBC) केर कुर्मी जातिसँ छथि। ओ अपन प्रारंभिक शिक्षा अपन गाँवमे पूरा कयलनि, फेर पटना साइंस कॉलेजसँ 12म पास कयलनि आ 1979 मे पटना कॉलेजसँ इतिहासमे स्नातक (ऑनर्स) केर डिग्री हासिल कयलनि। तकर बाद ओ 1982 मे नई दिल्ली केर जवाहरलाल नेहरू विश्वविद्यालयसँ अंतरराष्ट्रीय संबंधमे मास्टर डिग्री प्राप्त कयलनि।
RCP सिंह 1984 बैच केर उत्तर प्रदेश कैडरक IAS अधिकारी छलथि। ओ भारतीय राजस्व सेवा (IRS) मे शुरुआत कयलनि, मुदा बादमे IAS मे चयनित भेलाह। ओ सुल्तानपुरमे संयुक्त मजिस्ट्रेट केर रूपमे पहिल पोस्टिंगसँ लऽ कऽ कतेको जिलामे कलेक्टर आ जिला मजिस्ट्रेटक रूपमे काज कयलनि। केंद्रीय प्रतिनियुक्ति केर समय ओ नीतीश कुमारक निजी सचिव रहलाह, जखनि नीतीश रेलवे आ कृषि मंत्रालयमे केंद्रीय मंत्री छलथि। नीतीश केर 2005 मे बिहारक मुख्यमंत्री बनलाक बाद, सिंहकेँ बिहार वापस लाओल गेल आ ओ गृह विभाग एवं कैबिनेट सचिवालयमे प्रधान सचिवक रूपमे महत्वपूर्ण भूमिका निभेलाह। आब जनसुराजमे सम्मलित भऽ गेल छथि।
